Бухорода бир қисми ўпирилиб тушган Талипоч қалъа дарвозаси таъмирига 1 млрд сўм ажратилди

Бухородаги Талипоч қалъа дарвозасининг бир қисми ўпирилиб тушгани хабар қилинганди. Таъмирлаш ишлари учун 1 миллиард сўм маблағ ажратилди.

Бухоро шаҳрида кузатилган муттасил ёғингарчилик оқибатида 11 март куни кечки пайт Талипоч қалъа дарвозасининг чап томонида қулаб тушган қалъа девори қисмини ва Талипоч дарвозасини таъмирлаш учун пуллар Республика бюджети маблағлари ҳисобидан ажратилган.

Вазирлар Маҳкамаси томонидан март ойида тасдиқланган «2022 йил давомида асрашга доир ишлар амалга ошириладиган моддий маданий мерос кўчмас мулк объектларининг Манзилли рўйхати»га асосан мазкур объектни таъмирлаш-тиклаш ишлари Маданий мерос объектлари реставрацияси дирекцияси томонидан амалга оширилади. Ҳозирда масъул соҳа мутасаддилари ва мутахассислар томонидан ушбу объектнинг лойиҳа олди ишлари олиб борилмоқда.

Маълумот учун, ўтган йиллар давомида XVI асрга тегишли, 2003 йилда қайта тикланган Талипоч қалъа дарвозаси атрофидаги деворнинг чап қаноти ортидаги маданий қатламларнинг чўккани, қоплама деворларида ёриқлар пайдо бўлгани ҳамда март ойида кузатилган доимий ёғингарчилик деворнинг чўкиши ва қулаб тушишига олиб келгани аниқланган.

Янгиликлар