Ўзбекистонда МЧЖнинг таъсис шартномасини рўйхатдан ўтказиш бекор қилинади
Ўзбекистонда масъулияти чекланган жамият (МЧЖ)нинг таъсис шартномасини давлат рўйхатидан ўтказиш бекор қилинади.
Қайд этилишича, Президент 8 ноябрь куни «Корпоратив муносабатларнинг ҳуқуқий асосларини янада такомиллаштириш чора-тадбирлари тўғрисида»ги қарорни имзолаган.
Унга мувофиқ, 2022 йил 1 декабрдан тижорат ташкилотлари фаолиятида қуйидаги талаблар бекор қилинади:
қуйидаги ташкилотларда ички аудитни ташкил этиш:
- масъулияти чекланган жамиятлар;
- активларининг баланс қиймати БҲМнинг 100 минг баробаридан кам, давлат улуши 50 фоиз ва ундан кўп акциядорлик жамиятлари ва давлат унитар корхоналари;
- МЧЖнинг таъсис шартномасини давлат рўйхатидан ўтказиш;
- МЧЖнинг вакилларига умумий йиғилишда иштирок этиш учун бериладиган ишончномани нотариал тасдиқлаш;
- МЧЖда захира жамғармаси ташкил этилганда, унинг миқдорини устав фондининг камида 15 фоизи этиб белгилаш.
Шунингдек, 2023 йил 1 мартдан унитар корхона ёки қўшимча масъулиятли жамият шаклида юридик шахс ташкил этиш тўхтатилиши таъкидланган.
2023 йил 1 апрелдан:
- МЧЖ устав фондига қўшиладиган, қиймати БҲМнинг 10 минг бараваридан кўп пульсиз ҳиссалар баҳоловчи ташкилот томонидан баҳоланади ва баҳоланган қийматдан юқори бўлиши мумкин эмас;
- юридик шахслар қайта ташкил этилганда, корхоналарнинг ҳуқуқ ва мажбуриятлари қайта ташкил этилган юридик шахсга ўтган ҳисобланади.
Шу билан бирга, 2023 йил 1 июлдан хўжалик жамиятининг филиаллари, ваколатхоналари ташкил этилганлиги ва унинг устав фонди шакллантирилганлиги ҳамда тўловга қобилиятсизлиги юзасидан иш қўзғатилганлиги тўғрисидаги маълумотлар Ягона интерактив давлат хизматлари портали (my.gov.uz)да эълон қилиниши маълум қилинган.
