Ўзбекистон иқтисодиёти 2021 йил қанчага ўсгани маълум бўлди
Ўзбекистон иқтисодиёти 2021 йил 7,4 фоизга ўсди. Бу ҳақда Молия вазирлигининг 2021 якуни бўйича макроиқтисодий кўрсаткичлар шарҳида маълум қилинди.
Хабарга кўра, глобал миқёсда давом этаётган пандемия ҳамда иқтисодий вазият билан боғлиқ мавҳумликлар сақланиб қолаётган шароитида Ўзбекистон иқтисодиёти ўз вақтида мувофиқлаштирилган фискал ва монетар сиёсат натижасида 7,4 фоиз ўсишни қайд этиб, жадал равишда тикланишда давом этган.
Шунингдек, 2021 йил якунлари бўйича эълон қилинган Жаҳон банки ҳисоботига кўра, Ўзбекистоннинг йирик иқтисодий ҳамкор давлатларининг иқтисодиётларида ўсиш қайд этилган.
Хусусан, Россиянинг иқтисодиёти 2020 йилда 3,0 фоизга қисқарганидан сўнг, 2021 йилда 4,3 фоизга ўсганлиги ҳисобланган. Халқаро валюта жамғармасининг январдаги ҳисоботи бўйича ушбу кўрсаткич 4,5 фоизга етган.
Шу билан бирга, Хитой иқтисодиёти 2020 йилда 2,2 фоизга секинлашгандан сўнг, 2021 йилда, Жаҳон банкига кўра 8,0 фоизга ва Халқаро валюта жамғармасига кўра 8,1 фоизга ўсган. Бундан ташқари, Жаҳон банкига кўра, 2021 йилда Қозоғистон иқтисодиёти 3,5 фоизга ва Туркия иқтисодиёти 9,5 фоизга ўсганлиги қайд этилган.
