Хоразмда қурилиш соҳаси назоратчи инспектори пора билан ушланди

Хоразм вилояти Хонқа туманида вилоят қурилиш соҳасида ҳудудий назорат инспекцияси етакчи инспектори ушланди.

Таъкидланишича, Бош прокуратура ҳузуридаги департамент ҳамда ДХХнинг Хоразм вилояти бошқармалари томонидан тезкор тадбир ўтказилган. Унда етакчи инспектор Р.Р. фуқаро Р.нинг Хонқа тумани Қирқёп қишлоғидаги биносини фойдаланишга қабул қилиш ҳақидаги мурожаатини ижобий ҳал этилиши учун пул талаб қилгани аниқланган.

Бино инспекция томонидан кўриб чиқилиб, қабул қилиш рад қилинган бўлса-да, Р.Р. хизмат мавқеидан фойдаланиб, ишни ижобий ҳал қилиб бериш эвазига 1000 долларни олган вақтида ашёвий далиллар билан ушланган. Мазкур ҳолат юзасидан Жиноят кодексининг 168-моддаси (Фирибгарлик) билан жиноят иши қўзғатилиб, тергов ҳаракатлари ўтказилмоқда.