Путин Россияда аҳолини коронавирусга қарши эмлаш қачон бошланишини маълум қилди
Россия президенти Владимир Путин бош вазир ўринбосари Татяна Голиковага келгуси ҳафтадан бошлаб аҳолини COVID-19’га қарши эмлашни бошлаш бўйича топшириқ берди, деб ёзади «РИА Новости».
Фото: «kremlin»
Президентнинг таъкидлашича, у илгари Голикова ва бош вазир Михаил Мишустин билан корнавирусга қарши препаратлар ишлаб чиқариш масалаларини муҳокама қилган.
Мавзуга доир: Россияликлар бир йил ичида коронавирусга қарши вакцина билан тўлиқ таъминланиши мумкинлиги маълум қилинди
«Мамлакатда икки миллиондан ортиқ доза аллақачон ишлаб чиқарилган ёки яқин бир неча кун ичида ишлаб чиқарилади. Дунёда биринчи бўлиб рўйхатдан ўтган коронавирус инфекциясига қарши вакцина — ‘Sputnik V’ ҳам шу даражага етади. Бу бизга кенг миқёсли эмлашни бошлаш имкониятини беради. Келишилганидек, эмлашни иккита хавф гуруҳи — шифокорлар ва ўқитувчилардан бошлаймиз», — деган Путин.
Президентнинг сўзларига кўра, Россия саноати кенг кўламли эмлашга тайёр.
Ноябрь ойи охирида Соғлиқни сақлаш вазири Михаил Мурашко таъкидлаганидек, коронавирус учун хавфли гуруҳларга соғлиқни сақлаш ходимлари, ўқитувчилар, шунингдек, кексалар ва диабет, семириш, гипертензия билан оғриганлар киради. Унинг сўзларига кўра, 2021 йилда коронавирусга қарши эмланганлар сони бир неча ўн миллионлаб кишига етиши мумкин. Ўз навбатида, президент матбуот котиби Дмитрий Песков COVID-19’га қарши эмлаш ихтиёрий равишда ва турли босқичларда амалга оширилишини таъкидлаган.
Аввалроқ Путин Россияда коронавирусга қарши биринчи вакцина рўйхатдан ўтказилганини маълум қилган эди. Шундан сўнг мамлакатда коронавирусга қарши ишлаб чиқилган вакцинанинг экспорт нархи эълон қилинган. Унга кўра, вакцинанинг икки дозаси 10 доллардан кам бўлмайди. Шунингдек, дастлабки дозалар катта эҳтимол билан анча қимматроқ бўлиши таъкидланган.
