Тошкентдаги тўйда тўппончадан «ўқ узган» куёвжўра иши бўйича маълумот берилди (видео)
Тошкент шаҳар Ички ишлар бош бошқармаси матбуот хизмати 5 октябрь куни ижтимоий тармоқларда тарқалган тўйдаги меҳмонлардан бири осмонга қарата тўппончадан ўқ узаётгани акс этган видео юзасидан расмий маълумот берди.
Фото: Тошкент шаҳар ИИББ матбуот хизмати
Маълум қилинишича, Тошкент шаҳар ИИББ томонидан мазкур видео ўрганилган, видеодаги одамларнинг, хусусан, ўқ узган кишининг шахси аниқланган.
Ўрганиш ишлари натижасида ўқ узган киши Тошкент вилоятилик 25 ёшли Салихов Улуғбек эканлиги маълум бўлган. Унинг сўзларига қараганда, у қариндоши бўлмиш куёвга тўй куни куёвжўралик қилган.
«19 cентябрь куни куёв ва унинг дўстлари Чилонзор туманига келиннинг уйига келишганида Улуғбек кейинчалик ‘қизиқарли ролик’ тайёрлаш учун бозордан сотиб олган ўйинчоқ пластмасс тўппончани осмонга кўтарган. Шу лаҳзалар видеооператорлар томонидан тасвирга туширилган. 4 октябрь куни кечқурун Улуғбекнинг ўзи видеони монтаж қилиб, ўқ узиш товушларини қўшган ва видеони Instagram’даги саҳифасига жойлаган. Кейинчалик мазкур видеони интернетда тарқатган», дейилади ИИББ хабарида.
Aввалроқ Фарғонада ўтказилган профилактик тадбирларда 17 нафар шахснинг тақиқланган қурол олиб юргани аниқлангани ҳақида хабар берилганди. Шунингдек, Фарғона шаҳрида «Captiva»ни маст ҳолатда бошқарган ҳайдовчи аниқлангани хабар қилинган. Маълум бўлишича, унинг машинасидан пистолет топилган.
