Нурафшон шаҳрида «Келажак технологиялари маркази» ташкил этилади
Марказ корхоналарига IT-парк резидентлари билан бир хил имтиёзлар берилади. Роботлар, электроника ва технологик ускуналар ишлаб чиқариш учун зарур хомашё ҳамда бутловчи қисмлар импорт божидан озод этилади
Президент Шавкат Мирзиёев электротехника саноати вакиллари, соҳада фаолият юритаётган тадбиркорлар ва инвесторлар билан учрашув ўтказмоқда.
Қайд этилишича, кейинги ўн йилда электротехника саноатида катта ўзгаришлар амалга оширилган. Соҳага 2 млрд доллар инвестиция киритилиб, 413 та янги ишлаб чиқариш қуввати ишга туширилган.
Хусусан, маиший техника, қуёш панеллари, электрон ҳисоблагичлар, юқори кучланишли трансформаторлар каби 100 дан ортиқ турдаги янги маҳсулотлар ишлаб чиқариш йўлга қўйилган.
Натижада жорий йилда соҳада маҳсулот ишлаб чиқариш ҳажми 50 трлн сўмга етган Мазкур кўрсаткич 2016-йилда 1,7 триллион сўм бўлган. Инвестициялар 600 миллион долларга, экспорт эса 1 миллиард 600 миллион долларга етказилди. Ўтган даврда экспорт ҳажми 14 баробар ўсди.
Давлат раҳбари бу мавжуд имкониятларга нисбатан кам эканини, соҳани янада жадал ривожлантириш зарурлигини таъкидлади. Мамлакатда юқори технологияли саноатни ривожлантириш учун зарур пойдевор шаклланмоқда.
Тўқимачилик, металлни қайта ишлаш, қурилиш ва бошқа соҳалар учун технологик ускуналар чиқарадиган ўнлаб корхоналар пайдо бўлди. Оҳангарон технопаркида микропроцессор модуллари ишлаб чиқарилмоқда, кореялик ҳамкорлар билан Тошкент шаҳрида роботлар ишлаб чиқариш лойиҳаси бошланган.
Бундай корхоналарни кўпайтириш орқали иқтисодиёт тармоқларини замонавий ускуналар, саноат роботлари ва электроника маҳсулотлари билан таъминлайдиган яхлит экотизимни шакллантириш мақсад қилинган.
Шу боис, Нурафшон шаҳрида «Келажак технологиялари маркази» ташкил этилади. Марказ корхоналарига IT-парк резидентлари билан бир хил имтиёзлар берилади. Роботлар, электроника ва технологик ускуналар ишлаб чиқариш учун зарур хомашё ҳамда бутловчи қисмлар импорт божидан озод этилади. Ушбу йўналишдаги илмий ишланмалардан олинган даромадга солиқ солинмайди.
