Олтиариқда 11 млн сўм алимент тўлаган эркак оиласи билан ярашди
Фарғона вилояти Олтиариқ туманида ота қизининг 18 ёшга тўлгунга қадар бўлган алиментни тўлаб, оиласи билан ярашди. Бу ҳақда Мажбурий ижро бюроси туман бўлими «Tez News»га хабар берди.
Фото: «Tez News»
Хабарга кўра, Мажбурий ижро бюроси Олтиариқ туман бўлими иш юритувига Фуқаролик ишлари бўйича Риштон туманлараро судининг 2020 йил 11 октябрдаги буйруғига асосан қарздор Ш.Ф.дан ундирувчи М.Ф. фойдасига бир нафар фарзандининг моддий таъминоти учун алимент ундириш бўйича ижро ҳужжати келиб тушган.
Шундан сўнг қарздор Ш.Ф. ўз фарзандига оталик қилиш учун оиласини тиклаш ниятида 15 октябрда бюронинг туман бўлимига мурожаат қилган.
Ундирувчи М.Ф.нинг бюро ходимлари билан ўтган суҳбат жараёнида алимент пулини қизи 18 ёшга тўлгунга қадар бўлган қисмини олдиндан тўлаб берган тақдирда ярашишга розилигини маълум қилган. Кейинчалик ҳисобланган жами 11 миллион 160 минг сўм алимент қарзи ота томонидан олдиндан тўлиқ тўлаб берилган. Натижада оила ўзаро яраштирилиб, ижро ҳужжати бўйича мажбурий ижро ҳаракатлари тўхтатилган.
Аввалроқ Пастдарғомда ота 40 млн сўм алимент пулини олдиндан тўлагани, Наманганда алиментдан салкам 2,5 млн сўм қарзи бор эркак хотини билан ярашиб олгани, Булоқбошида ота хорижга чиқиш учун 8 минг доллар алимент пулини олдиндан тўлагани ҳамда Жалақудуқда ота алимент пуллари ўрнига 2 нафар фарзандига уй совға қилгани ҳақида хабар қилинганди.
