«Қонуний овозлар учун курашавераман». Трамп Байден президентликка тасдиқланганидан сўнг баёнот берди

АҚШнинг 45-президенти Дональд Трамп 7 январь, пайшанба куни Конгресс сайлов натижаларини маъқуллагандан сўнг чиқиш қилиб, натижалардан мутлақо рози эмаслигини маълум қилди, деб хабар бермоқда «CNN» телеканали.

Фото: «Reuters»

Таъкидланишича, Трамп норозилигига қарамай, ҳокимиятни 20 январь куни Байденга топширмоқчи. «Мен сайлов натижаларидан мутлақо рози эмаслигимга қарамай (фактлар менинг сўзларимни тасдиқлайди), 20 январь куни ҳокимиятнинг стандарт тарзда янги президентга ўтказилиши амалга оширилади», — дейди у.

Шунингдек, у «фақат қонуний овозлар» инобатга олиниши учун курашни давом эттиришини айтиб ўтган. «Тарихдаги энг буюк президентлик даври охирига етган бўлса-да, бу Американи янада буюк қилиш учун курашнинг фақат бошланиши эди», — деб қўшимча қилди Трамп.

Ушбу баёнотдан олдин АҚШ Конгрессининг иккала палатаси қўшма йиғилиши бўлиб ўтган ва унда Байденнинг президент этиб сайланиши маъқулланган эди.

Аввалроқ мунозаралар Вашингтондаги мисли кўрилмаган тартибсизликлар фонида бўлиб ўтгани, унинг давомида амалдаги давлат раҳбарининг тарафдорлари АҚШ Конгресси биносига бостириб киришга ҳаракат қилгани ҳақида хабар берилган эди. Тартибсизликлар пайтида тўрт киши ҳалок бўлган: бир аёл Капитолий биносида отиб ўлдирилган, яна уч киши бино атрофида ўлдирилган эди.