«Трамп нега ҳали ҳам президентликка ёпишиб олганини тушунмаяпман» — Байден

АҚШнинг янги сайланган президенти Жо Байден амалдаги президент Дональд Трамп ишларни унга топшириш тартибини атайлаб кечиктираётганини, «президентликка ёпишиб олгани»ни ўзининг Жоржия штатидаги тарафдорлари олдида сўзлаган нутқида айтиб ўтди.

Фото: «Bloomberg»

Байденнинг сўзларига кўра, Трамп маъмурияти бошиданоқ муаммоларга дуч келган. «Президент муаммоларни ҳал қилиш ўрнига вақтни беҳуда сарфлаган. У шикоят қилиб, нолийверади. Нима учун у ҳали ҳам президентликка ёпишиб олганини тушунмаяпман», — дейди демократ.

Таъкидланишича, Жоржияда 5 январь куни Сенат сайловларининг иккинчи босқичи бўлиб ўтади. Бунинг натижасида Конгресснинг юқори палатаси устидан назорат белгиланади. Номзодлар Девид Пурдю ва Келли Лоэффлер иккала мандатни қўлга киритган тақдирда республикачилар Сенатда кўпчилик овозини сақлаб қолади. Байден ўз нутқида Пурдуэ ва Леффлер Жоржия халқига ёки АҚШ Конституциясига эмас, балки амалдаги президентга содиқ бўлиш учун қасамёд қилганларини айтган.

Декабрь ойи охирида Байден Трамп маъмуриятини масъулиятсизликда айблаб чиққанди. Унга кўра Трамп ишларни сайланган президентга топшириш тартибини атайлаб кечиктирмоқда. «Ҳозир биз миллий хавфсизликнинг муҳим йўналишлари бўйича чиқаётган маълумотларни ололмаяпмиз. Менимча, бу масъулиятсизликдан бошқа нарса эмас», — деган Байден.

Аввалроқ Байден президентликка киришгач, Трампнинг бир қатор фармонларини бекор қилмоқчилиги маълум қилган эди. Шунингдек, унинг АҚШни дунё саҳнасидаги «ўйин»га қайта олиб чиқишга ваъда бергани хабар қилинган.