Сирдарёда салкам 80 млн сўмлик автомобиль шиналарини Ўзбекистонга ноқонуний олиб кирмоқчи бўлган шахс ушланди
Сирдарёда 80 миллион сўмлик автомашина шиналари, 38 миллион сўмлик машина эҳтиёт қисмларини Ўзбекистонга ноқонуний олиб кирмоқчи бўлганлар ушланди. Бу ҳақда Божхона қўмитаси ахборот хизмати «Тez News»га хабар қилди.
Фото: Божхона қўмитаси ахборот хизмати
Хабарга кўра, вилоят божхона бошқармаси Контрабандага қарши курашиш ва божхона аудити бўлими ходимлари томонидан «Сирдарё» чегара божхона постига қўшни давлатдан кириб келган фуқаро М.З. бошқарувидаги «Volvo» русумли автотранспорт воситаси белгиланган тартибда божхона кўригидан ўтказилган. Натижада, автомашина юкхонасида йўл юк кузатув ҳужжатларида кўрсатилмаган, фуқаро Х.Ж.га тегишли бўлган умумий қиймати 79,8 миллион сўмлик, турли ўлчамдаги юк автомашинаси дискалари борлиги маълум бўлган.
Мавзуга доир: Жиззахда 54 млн сўмлик автомобиль «запчаст»ларини Ўзбекистонга ноқонуний олиб кирмоқчи бўлган шахс ушланди
Шунингдек, яна бир ҳолатда мазкур пост орқали мамлакатга кириб келган, фуқаро Р.С. бошқарувидаги «Volvo» русумли юк автотранспорти божхона кўригидан ўтказилган. Текширув давомида автомашинада «Камаз» русумли юк автотранспорт воситасига тегишли бўлган 98 дона, умумий қиймати 38 миллион сўмлик авто эҳтиёт қисмлари борлиги аниқланган.
Ҳозирда аниқланган ҳолатлар юзасидан божхона органлари томонидан суриштирув ҳаракатлари давом эттирилмоқда.
Aввалроқ Янгиқўрғонда 125 миллион сўмлик аёллар кийимларини тегишли ҳужжатларсиз олиб юрган шахс ушлангани ва Фарғонада салкам 902 миллион сўмлик товарларни кўмир остига беркитиб, Ўзбекистонга олиб кирмоқчи бўлган юк машинаси ҳайдовчиси қўлга олингани ҳақида хабар берилганди.
