«Ичидан пулларини олиб, банкоматни ташлаб юбордик». Тошкентда 7 та банкоматни ўмарган эркаклар ушланди
Тошкент шаҳрида 15 декабрдан 2 январгача бўлган вақт оралиғида 7 табанкоматни ўмарган икки нафар эркак ушланди. Бу ҳақда «Zamon» информацион дастурида хабар берилди.
Кадр: Telegram / @zamonuz
Хабарга кўра, Яшнобод тумани Қорасув кўчасидаги 5ғуй ёнида жойлашган дўкон ёнидан Paynet банкомати ўғрилангани тўғрисида маълумот келиб тушган. Ушбу ҳолат юзасидан қидирув ишлари олиб борилган вақтда давлат рақами ечилган оқ «Damas»га солиб олиб кетилгани маълум бўлган. Аниқлаш чоралари олиб борилган ва икки нафар шахс қўлга олиниб, туман тергов бўлимига топширилган.
Маълум қилинишича, гумонланаётган икки нафар шахс 15 декабрдан 2 январгача бўлган вақт оралиғида жами 7 та банкоматни ўғирлаб кетган ва уларни бузиб, ичидаги пулларни сарфлаб юборган. Таъкидланишича, мазкур икки нафар шахс — 1990 йилда туғилган Д. ва 1989 йилда туғилган Р. муқаддам ҳам судланиб, жазо муддатини ўтаб чиққан.
«Биринчисини Сергели ‘строителный’да ўғирладик. Д. симини кесди. Иккаламиз кўтариб, машинасига ортиб юбордик. Хонобод йўлидаги далада очиб, сиднириб, пулини олдик», — дейди гуманланувчи Р.
Гуманланаётган иккинчи шахс Д. эса банкоматни очиб, пулларини олгач, банкоматни ташлаб юборганини тан олган. «Ичидаги пулларни олиб, банкоматни ташлаб юборганмиз. Орадан тахминан 5 кун ўтиб, Мирободга бориб банкоматни кўриб, ўшани олдик. Кейин Тапоичнинг янги йўлига олиб бориб ташладик», — дейди у.
Ҳолат юзасидан Жиноят кодексининг 169-моддаси (Ўғрилик) 3-қисми «а» банди билан жиноят иши қўзғатилган.
Аввалроқ Улуғнорда хонадондан қарийб 13,5 миллион сўмлик тилла тақинчоқларни ўғирлаганлар қўлга олингани, Қўштепада ўзи ишлаган уйдан салкам 4 миллион сўмлик қурилиш анжомларини ўғирлаб кетган уста ушлангани хабар қилинган эди.
