UzAuto Motors автомобилларни харид қилиш бўйича шартномаларни қайта сотишга изоҳ берди
UzAuto Motors компанияси автомобилларни харид қилиш тартибини соддалаштириш, ушбу жараённинг шаффофлигини таъминлаш механизмини такомиллаштириш устида мунтазам равишда иш олиб бормоқда.
Айрим шахслар учун олдиндан тўловнинг камайтирилганлиги, шунингдек шартномани онлайн расмийлаштириш имконини берувчи қулай тизимнинг жорий этилиши автомобилни шахсий фойдаланиш учун эмас, балки фақат тижорат мақсадларида (қайта сотиш) сотиб олиш учун ишлатила бошланди.
Шу муносабат билан эслатиб ўтамизки, агар бир шахс номига йилига бир хил модел учун 2 тадан ортиқ автомобил харид қилинса, ҳар бир кейинги автомобил «навбатнинг» охирига ўтади ҳамда автомобилларни етказиб бериш муддати 120 кунга ошади. Кейинчалик бир киши томонидан бир нечта автомобилларни сотиб олиш амалиёти такрорланган тақдирда компания истеъмолчилар учун автомобиллар мавжудлигини таъминлаш мақсадида ушбу муддатни 270 кунгача узайтиришни кўриб чиқмоқда.
Шунингдек, шу кунларда турли хил интернет реклама эълонлари хизматида (мисол учун, olx.uz) «автомобилни қайта сизнинг номингизга расмийлаштириш ваъдаси» билан тўлови амалга оширилмаган шартномаларни «сотиб олиш» таклифлари пайдо бўлди.
Эътибор беринг, шартнома «UzAutoSanoat» тизими томонидан автоматик тарзда тузилади. Ундаги маълумотларни на харидор на дилер томонидан ўзгартиришнинг имкони йўқ. Қолаверса, автомобилни олгандан сўнг, тизим харидорнинг иштирокида давлат рақамини рўйхатдан ўтказиш учун Йўл-ҳаракати хавфсизлиги давлат хизматига (ЙҲХДХ) электрон ҳисоб-фактурани юборади.
