Байден Пентагон раҳбари лавозимига номзодни эълон қилди

АҚШнинг янги президенти Жозеф Байден истеъфодаги генерал Ллойд Остин номини Пентагон раҳбари лавозимига кўрсатди. Бу ҳақда «The Atlantic» нашрининг электрон версиясида чоп этилган мақолада айтиб ўтилди.

Фото: «EPA»

Мақолага кўра, Байден «Нега мен Ллойд Остинни Мудофаа вазири этиб танладим?» сарлавҳали материалида бу танловини «Бизга дуч келадиган муаммоларга мос келадиган ишончли раҳбар керак», деб изоҳлаган. Байденнинг айтишича, Остин илгари Ироқда жанг қилган «АҚШнинг 150 минг аскарининг қайтарилишида муҳим роль ўйнаган».

«Бугун мен яна Ллойд Остиндан мамлакат олдидаги вазифасини бажаришини сўрайман, бу сафар АҚШ мудофаа вазири сифатида. Мен у жуда яхши ишлай олишини биламан», — деб қўшимча қилган Байден.

Таъкидланишича, Остин тўрт йилдан кўпроқ вақт олдин ҳарбий хизматдан нафақага чиққан. Америка қонунчилигига кўра, мудофаа вазири лавозимига номзоди кўрсатилган шахс ҳарбийликдан нафақага чиққанига етти йил тўлган бўлиши керак.

Демократлар бу ҳолатда сенаторлар Остин учун истисно қилишига умид билдирган. «Мамлакатимиз дуч келаётган жиддий ва шошилинч таҳдидларни ҳисобга олган ҳолда унинг номзоди тезда тасдиқланиши керак», — дея таъкидлаб ўтган Байден.