Мисрда 40 нафар террорист йўқ қилинди
Мисрда хавфсизлик кучлари Шимолий Синай губернаторлигида ўтказилган аксилтеррор операцияларида 40 нафар террорчини йўқ қилди. Бу ҳақда 9 декабрь, чоршанба куни Миср армиясининг баёнотига асосланиб, «Синхуа» хабар берди.
Фото: «VCG Photo»
Маълум қилинишича, хавфсизлик кучлари аксилтеррор операцияларидан бирида террорчиларнинг бир нечта яширин жойларини йўқ қилган. Шунингдек, 25 нафар террористни ўлдирган. Яна бир амалиёт натижасида 15 нафар террорчи ўлдирилгани айтилган.
Бундан ташқари, олтита автомобиль, бешта ерости йўлаги йўқ қилинган. 159 та портловчи моддалар тўплами, 32 та мотоцикл, ўқотар қурол ва симсиз алоқа воситалари олиб қўйилган. Ушбу икки операция давомида икки зобит ва тўрт аскар ҳалок бўлган. Шу билан бирга, операция ўтказилган вақт кўрсатилмаган.
Эслатиб ўтамиз, май ойида Миср ҳуқуқни муҳофаза қилиш органлари ходимлари Синай ярим оролида ўтказилган махсус операция давомида террорчилар яширинган жойни аниқлаб, жанг пайтида 18 жангарини йўқ қилган эди. Ушбу махсус операция Шимолий Синайда тўққиз нафар аскар ҳалок бўлган портлашдан икки кун ўтгач амалга оширилган.
