Ўзбекистонда талабларни бажармаган газ қуйиш шохобчаларига газ етказиб берилмайди

Энергетика вазири ўринбосари Беҳзод Норматов тегишли қарорларда кўрсатилган талабларни бажармаган газ қуйиш шохобчаларига газ етказиб берилмаслигини маълум қилди. У бу ҳақда «Бу кун» дастурига берган интервюсида таъкидлаган.

Фото: «Tez News»

Хабарга кўра, Беҳзод Норматов аҳоли ва ижтимоий соҳа объектларини узлуксиз равишда табиий газ билан таъминлаш мақсадида газ қуйиш шохобчаларига киритилган чекловлар юзасидан изоҳ берган ва газ тизимидан интенсив равишда фойдаланадиган истеъмолчиларни биринчи навбатда ўчирилишини таъкидлаган.

«Биринчи навбатда аҳоли ва ижтимоий объектларга газни бир маромда етказиб беришни таъминлашимиз керак. Газ тизимидан интенсив равишда фойдаланадиган истеъмолчиларни биринчи навбатда ўчиришга мажбурмиз.

Автомобильларга газ компрессорлари орқали қуйиш шохобчаларини соат 17:00 дан 05:00 гача қисқартириш режалаштирилган. Бу орқали газнинг аҳолига етиб боришини таъминлашимиз зарур», — деди энергетика вазири ўринбосари.

Унинг маълум қилишича, бир қанча газ қуйиш шохобчалари расмий мурожаатларга қарамасдан шартларни бажармаган, шу сабабли уларга нисбатан қатъий чора кўрилмоқда:

«Тегишли қарорлар чиққан. Бу бўйича рўйхат тайёрлаганмиз. Октябрь охирига қадар аҳоли линиясида ўтирган компрессор станциялари саноат корректорларига ўтиши шарт бўлган. Бундан ташқари ўлчагичларни уланиш нуқтасига олиб чиқиш керак эди. Бир қанча расмий мурожаатларга қарамасдан бу нарсани бажармаган шу сабабли уларга нисбатан қатъий чора кўришни бошлаймиз. Токи қарорлар бўйича талабга жавоб берилмагунча улар ўчирилади».

Аввалроқ Андижондаги барча АЁҚШлар 27 октябрдан соат 16:00 га қадар ишлаши белгилангани ҳақида хабар берилганди. Шунингдек, Наманганда санитария-гигиена шохобчалари билан жиҳозланмаган ёқилғи қуйиш станциялари фаолияти тўхтатилгани ҳақида хабар берилган.