Қаршида 5 гектарга яқин мош майдони «темир дафтар»даги фуқароларга тақсимлаб берилди (фото)
Қашқадарё вилоятида кичик бизнес ва тадбиркорликни ривожлантириш, камбағалликни қисқартириш ишлари асосида Қарши туманидаги 5 гектарга яқин мош майдони «темир дафтар»даги фуқароларга тақсимлаб берилди, шунингдек, кичик зонадаги тикувчилик цехида 35 нафар, пахта пунктида 250 дан ортиқ кам таъминланган ва эҳтиёжманд фуқаролар иш билан таъминланди. Бу ҳақда «Tez News» мухбири Шоҳруҳ Ҳайдаров хабар берди.
Фото: «Tez News»
Маълум бўлишича, 5 гектарга яқин майдонда мош ўсимлиги экилган бўлиб, унинг 50 сотихдан қисми ҳар бир эҳтиёжманд, кам таъминланган ва «темир дафтар»га киритилган оилалар учун тақсимланган. Дала майдонида мош уруғи туман ҳокимлиги томонидан эктирилиб, сўнгра оилаларга бўлиб берилган. Бу ерда етиштирилган дуккакли маҳсулот Ўзбекистоннинг турли вилоятларида сотилади.
Фото: «Tez News»
Бундан ташқари, Қарши туманида жойлашган 1,4 гектар майдондаги кичик саноат зонасининг ҳарбийлар, болалар ва аёллар кийимлари, кўрпа-ёстиқ ҳамда чойшаблар ишлаб чиқарувчи тикувчилик цехида 40 нафар аёл ишлайди. Улардан 35 таси эса «темир дафтар»га киритилган фуқаро ҳисобланади. Маълумот ўрнида айтиш мумкинки, «темир дафтар» карантин шароитида ишсиз, даромадсиз қолган эҳтиёжманд, ёрдамга муҳтож оилаларнинг маҳаллада шакллантирилган шаффоф рўйхатидир. Унга киритилган аҳолига доимий равишда зарур ёрдамлар кўрсатилади. Камбағал аҳоли қатламини эҳтиёжмандликдан чиқариш учун мазкур оилаларга моддий ва ижтимоий кўмак берилади.
Фото: «Tez News»
«Бир нафар ўғлим бор. Яқинда маҳалла томонидан бир бош эчки ва 1 миллион сўм пул беришди. Кам таъминланган оилалардан бўлганлигим учун тикувчилик соҳаси бўйича ўқитилдим, ишга жойлашдим. Яқинда фарзандим учун 500 минг сўм пул ажратишганини айтишди. Карантин пайтида маҳалламиз, ишхонам бизни ўз ҳолимизга ташлаб қўймади. Озиқ-овқат маҳсулотлари беришди, моддий ёрдам қўрсатишди. Шунисига катта раҳмат», — дейди ходимлардан бири Умида Хўжаниёзова.
Фото: «Tez News»
Таъкидланишича, цех раҳбарияти томонидан ходимларнинг эҳтиёжманд оила вакилларига бир неча маротаба маблағ, озиқ-овқат маҳсулотлари, шунингдек, тикувчилик соҳаси бўйича бепул ўқитиш, ўқув жараёнларида 200 минг сўмдан стипендиялар ажратилган.
Шу билан бирга, 1-сектор ҳудудига қарашли «Қовчин» МФЙда жойлашган пахта пунктида 2020 йилги мавсумда иш сураб келган, «темир дафтар» бўйича рўйхатда турадиган ҳамда Россияда ишлаб қайтган фуқаролардан 271 нафари ишга йўналтирилган. Пунктда ишловчи фуқаролардан бири Баходир Шаропов ишга киришидан олдин Россияда бўлганини, қайтганидан кейин меҳнат биржаси вакиллари ёрдами билан ишга кирганлигини айтган. Шунингдек, отаси йўқ, онаси эса ёлғиз она бўлган Дилсўз Ражабова бандликка кўмаклашиш марказига мурожаат қилганида пахта пунктидан иш таклиф этишганини, шу пайтгача маҳалла томонидан 1 миллион сўм ва бошқа озиқ-овқат маҳсулотлари етказиб берилганини айтган.
Фото: «Tez News»
Фото: «Tez News»
Маълумот ўрнида, туманда «темир дафтар»га киритилган меҳнатга лаёқатли ишсизларни келгусида муқим иш жой билан таъминлаш борасида қуйидаги ишлар бошланган:
- ёшлар ва ҳотин-қизларни бандлигини таъминлаш бўйича ҳар бир махаллага енгил конструкциялик хизмат кўрсатиш шохобчалар (сартарошхона, гўзаллик салони, пойабзал таъмирлаш, миллий ширинликлар, тикувчилик, нонвойхона, нусха кўчириш) ташкил қилиш орқали 53 та МФЙда 371 та янги иш ўрни яратилади;
- инвестиция лойихаларини амалга ошириш ҳамда янги лойихаларни жалб қилиш орқали 750 нафар ишсиз ёш ва ҳотин-қиз ишга олинади;
- тумандаги кооперация томонидан ногиронлиги бўлган 112 нафар фуқароларга касаначилик бўйича тикув машиналари ва хом ашё билан таъминлаш орқали ҳамда Бандлик жамғармаси маблағлари орқали 100 та иссиқхона қурилади;
200 та артезиан қудуқ қазиб бериш ҳамда парранда, наслли чорва моллари олиб бериш натижасида 350 нафар «темир дафтар»га киритилган фуқаро иш билан таъминланади.
