Қаршидаги атиргул иссиқхонасида 6 нафар «темир дафтар»га киритилган аёл ишлайди (фото)
Қашқадарё вилоятида кичик бизнес ва тадбиркорликни ривожлантириш, «темир дафтар»га киритилган аҳолини камбағалликдан чиқариш борасида амалга оширилаётган ишлар билан танишиш мақсадида 7—8 сентябрь кунлари пресс-тур ташкил этилди. Унда «Tez News» мухбири Шоҳруҳ Ҳайдаров Қарши туманидаги вазиятни ўрганди.
Фото: «Tez News»
Президентнинг 2020 йил 24 апрель куни карантин даврида аҳоли бандлигини таъминлаш ва ижтимоий қўллаб-қувватлаш бўйича амалга оширилаётган чора-тадбирлар юзасидан ўтказилган видеоселектор йиғилишида берган топшириғи асосида ҳар бир сектор раҳбари томонидан эҳтиёжманд оилаларни қўллаб-қувватлаш дафтари — «темир дафтар» юритилиши йўлга қўйилган.
Шундан келиб чиқиб, Қарши тумандаги хонадонларни қайта хатлов натижасида 1728 нафар оилалар «темир дафтар»га қўшимча кам таъминланган оилалар сифатида киритилиб, жами 3573 оила, 14 278 нафар оила аъзоларини ташкил қилган ҳамда улардан 3166 нафари меҳнатга лаёқатли ишсизлар эканлиги аниқланган.
Қарши тумани ҳокимлигининг берган маълумотларига кўра, туманда 61 477 оилалардан 4387 таси (7 фоизи) «темир дафтар»га киритилган. Туманнинг масъул ходимлар (туман, вилоят сектор раҳбарлари) томонидан аҳоли турмуш шароитини ўрганиш, фуқароларга меҳнат қилиш ва даромад топишда йўл кўрсатиш, уларни иш билан таъминлаш — камбағалликдан чиқариш мақсадида бир қатор ишлар амалга оширилган. Шу пайтга қадар 2542 та (60 фоиз) оила депутатлар қарорларига кўра «темир дафтар»дан чиқарилган.
Биргина Алишер Навоий номидаги МФЙ ҳудудида тажриба тарзида атиргул етиштиришга ихтисослаштирилган иссиқхона ташкил этилган бўлиб, ҳозирда бу ерда 20 га яқин ишчи ходим иш билан таъминланган. Уларнинг орасида 6 нафари «темир дафтар»га киритилган оилалардан ҳисобланади.
Фото: «Tez News»
Фото: «Tez News»
Фото: «Tez News»
«Бизда, биринчидан, атиргулга эҳтиёж катта. Иккинчидан, биз бу атиргулларни четга экспорт қилиш ниятидамиз, у ерда ҳам атиргул анча талабгир. Гулларимиз биринчи марта очилганда пандемия шароитига тўғри келиб қолгани учун дўконлар ишламади, харидор йуқ эди, қирқиб ташлашга мажбур бўлдик.
Атиргулни экиш, уни парвариш қилиш учун менинг фикримча, айнан шу атиргулни тушунадиган мутахассис бўлиш керак экан. Чунки бу жуда инжиқ ўсимлик, эҳтиёткорлик билан, эътибор билан қараш керак. Биз мутахассислар тавсиясидан келиб чиқиб, атиргулларимиз учун мусиқа ҳам қўйиб берамиз. Бу эса ўсимликнинг ривожланиши, чиройли бўлиб очилишида, қўп ҳосил беришида ўз натижасини кўрсатар экан», — дейди атиргул иссиқхонаси яратувчиси Қудрат Тошов.
Фото: «Tez News»
Фото: «Tez News»
Фото: «Tez News»
Маълумотларга кўра, ушбу иссиқхона лойихаси учун 1 миллион 400 АҚШ доллари ажратилган, лойиҳа намунаси эса Корея фирмасидан олинган. 1,5 гектарга яқин майдонда гидропоника усулида қурилган ушбу ерда голландия навли 5 хил турдаги атиргуллар экилган бўлиб, умумий миқдори 90 тупни ташкил этади.
Бундан ташқари, Қарши тумани ҳокимининг молия-иқтисод ва камбағалликни қисқартириш масалалари бўйича биринчи ўринбосари Сардоржон Абдуллаевнинг айтишича, иссиқхона ёнидаги эски санаторий биноси ўрнида ёш она ва болалар учун реабилитация маркази қурилади.
Фото: «Tez News»
Маълумот ўрнида, Қарши туманида 2020 йилнинг январь—август ойларида янги ташкил этилган кичик бизнес субъектлари сони 235 тани ташкил этиб, белгиланган режа ижроси 63 фозни ташкил этган.
Аввалроқ Бухорода «темир дафтар»га киритилган 8 нафар, Бўстонда 3 нафар фуқаро ишга жойлангани ҳамда Каттақўрғонда «темир дафтар»даги 25 нафар фуқарога озиқ-овқат тарқатилгани ҳақида хабар берилганди.
