Шавкат Мирзиёев Вашингтонда АҚШ сенаторини қабул қилди

Ўзбекистон президенти Шавкат Мирзиёев 5 ноябр куни Вашингтон шаҳрига амалий ташриф доирасида ўзига ажратилган қароргоҳда АҚШ Сенатидаги Марказий Осиё бўйича кокуснинг ҳамраиси, сенатор Стив Дэйнсни қабул қилди.

Учрашувда, Ўзбекистон билан АҚШ ўртасидаги стратегик шериклик муносабатларини янада мустаҳкамлаш ва кўп қиррали ҳамкорликни кенгайтириш масалалари кўриб чиқилди. Давлат раҳбари парламентлараро алоқаларга, хусусан, Сенатдаги Марказий Осиё бўйича кокус фаолиятига юқори баҳо берди.

Шунингдек, икки томонлама ҳамкорликда юксак даражага эришилгани мамнуният билан қайд этилди. Ўзаро савдо кўрсаткичлари ўсаётгани, АҚШнинг етакчи компаниялари билан муваффақиятли кооперация лойиҳаларининг сони кўпайгани таъкиланди.

Кейинги ойларда рекорд қийматдаги келишув ва шартномалар имзолани билдирилди. Бу галги ташриф давомида янги иқтисодий ҳужжатлар имзоланиши режалаштирилгани маълум қилинди. АҚШ Конгресси мазкур келишувларнинг амалга оширилишини қўллаб-қувватлаши муҳим экани таъкидланди.

Сенатор Стив Дэйнс вакиллик қилаётган Монтана штати билан фаол ҳамкорликни давом эттиришга алоҳида эътибор қаратилди. Штат ишбилармонларининг делегациясини Ўзбекистонга ташрифини ташкил этиш бўйича келишувга эришилди.

Шунингдек, томонларни қизиқтирган долзарб халқаро ва минтақавий масалалар юзасидан фикр алмашилди.