Комил Алламжонов Жорж Вашингтон университети президенти ҳузуридаги Маслаҳат кенгаши йиғилишида иштирок этди
Ўзбекистоннинг Вашингтондаги элчихонаси маслаҳатчи-элчиси, Президент Администрациясининг АҚШдаги вакили Комил Алламжонов Жорж Вашингтон университети (GWU) президенти ҳузуридаги Маслаҳат кенгашининг навбатдаги йиғилишида қатнашди.
Учрашув давомида университет президенти Эллен Гранберг билан сунъий интеллект даврида олий таълимнинг истиқболлари, GWU’нинг стратегик ривожланиши ва янги имкониятлар юзасидан фикр алмашилди.
Мазкур Маслаҳат кенгаши таркибига таниқли жамоат арбоблари, йирик компаниялар раҳбарлари ҳамда университетнинг нуфузли битирувчилари киради. Кенгаш университетнинг келажакдаги ривожланиш йўналишларини муҳокама қилиш ва таклифлар ишлаб чиқиш учун муҳим платформа ҳисобланади.
Комил Алламжонов дунёнинг етакчи университетларидан бирининг ривожига ҳисса қўшиш ва ушбу кенгаш фаолиятида иштирок этишни ўзи учун катта шараф деб билишини таъкидлади.
Эслатиб ўтамиз, 2025 йилда Комил Алламжонов Жорж Вашингтон университетининг Эллиотт номидаги Халқаро муносабатлар мактаби ҳузуридаги Марказий Осиёни ўрганиш дастурининг махсус маслаҳатчиси этиб тайинланган эди.
Ушбу дастур Марказий Осиё бўйича илмий тадқиқотларни ривожлантириш, халқаро экспертлар, дипломатлар, сиёсатчилар ва бизнес вакиллари ўртасидаги ҳамкорликни мустаҳкамлашга хизмат қилади.
Жорж Вашингтон университети АҚШнинг сиёсий, иқтисодий ва ишбилармонлик соҳалари учун етук мутахассислар тайёрлайдиган нуфузли олий таълим муассасаларидан биридир. У U.S. News & World Report нашрининг 2027-йилги рейтингида АҚШдаги 427 та олий таълим муассасаси орасида 59-ўринни эгаллаган.
