Тошкентликлар кўп қаватли уйларнинг еттинчи қаватигача каламуш ва сичқонлар канализация орқали кириб бораётганидан шикоят қилди
Тошкент шаҳрида истиқомат қиладиган аҳоли кўп қаватли уйларнинг еттинчи қаватигача каламуш ва сичқонлар канализация орқали кириб бораётганидан шикоят қилди. Аҳоли ушбу ҳолатнинг бир неча сабаблари борлигини тахмин қилмоқда.
Фото: Амир Странник / Facebook
Маълум қилинишича, сўнгги кунларда Тошкент шаҳрининг турли ҳудудларидаги кўп қаватли уйларда сичқон ва каламушлар кўпайиб кетган. Ушбу ҳолат ижтимоий тармоқларда кенг муҳокама қилинмоқда. Кемирувчилар кўп қаватли хонадонларнинг юқори қаватларига канализация орқали ҳожатхоналардан кираётганлиги таъкидланган. Айтилишича, мазкур ҳолатга умумий овқатланиш объектларининг тўлиқ фаолият юритмаётгани сабаб бўлмоқда.
Таъкидланишича, умумий овқатланиш объектларининг чиқиндилари билан озиқланадиган кемирувчиларнинг карантин сабабли озуқаси камайган. Кемирувчилар озуқа излаб, аҳоли уйларига киришни бошлаган.
Ушбу ҳолатга нисбатан ўз фикрларини билдирган аҳоли ит ва мушукларнинг йўқ қилиниши кемирувчилар хонадонларда кўпайинишинг яна бир сабаби дея ҳисоблаган. Шунингдек, аҳоли пандемия даврида масъуллар томонидан дезинфекция ишлари амалга оширилмаганидан ҳам норозилигини билдирган. Бироқ муҳокамалар давомида каламуш ҳожатхона орқали хонадонларга кира олмаслиги ҳақида ҳам фикр қолдириган.
Мазкур ҳолат юзасидан «Теz News» мухбири Санитария-эпидемиологик осойишталик ва жамоат саломатлиги хизмати бошлиғининг ўринбосари Нурмат Отабеков билан боғланганда мутасадди ҳолатга муносабат билдирмади. Сўнгра мухбир Санитария ва эпидемиология осойишталик маркази билан боғланишга ҳаракат қилган. Аммо тақдим этилган телефон рақамига марказ ходимлари жавоб бермаган.
Аввалроқ Зарафшонда мушук ва итлар заҳарлаб, отиб ўлдирилаётгани ва ҳокимлик буни рад этаётгани ҳақида хабар берилган эди. Шунингдек, Жиззахда оёқлари боғланган мушук қийноққа солингани маълум қилинганди.
