AОКAга раҳбар этиб тайинланган Aсаджон Ходжаев «Ўзкомназорат» раҳбарлигидан озод этилди
Ҳукуматнинг тегишли қарори билан Асаджон Ходжаев Ўзбекистон Ахборотлаштириш ва телекоммуникациялар соҳасида назорат бўйича давлат инспекцияси раҳбарлигидан кетди.
Фото: «XS Online»
Маълум қилинишича, Асаджон Азатбекович Ходжаев AОКAга раҳбар этиб тайинлангани муносабати билан Ўзбекистон Ахборотлаштириш ва телекоммуникациялар соҳасида назорат бўйича давлат инспекциясининг бошлиғи лавозимидан озод этилган.
Aсаджон Хўжаев 2003—2004-йилларда Ўзбекистон Президенти ҳузуридаги Миллий хавфсизлик кенгаши аппаратининг етакчи консултанти, Aхборот-коммуникасия технологиялари ва ахборот хавфсизлигини ривожлантириш лойиҳаси раҳбари ўринбосари лавозимларида ишлаган.
2004—2011-йилларда Ўзбекистон алоқа ва ахборотлаштириш агентлиги бош директорининг ўринбосари, 2011—2012-йилларда Ўзбекистон Республикаси Интеллектуал мулк агентлиги бош директори, 2012—2017-йилларда Aлишер Навоий номидаги Ўзбекистон Миллий кутубхонаси директори, 2017-йилда Ўзбекистон бош вазири аппарати мудири, Ўзбекистон Президенти Давлат маслаҳатчиси ўринбосари — Ўзбекистон Президенти Матбуот хизмати раҳбари каби лавозимларда фаолият кўрсатган.
Эслатиб ўтамиз, Асаджон Ходжаев 29 июль куни Ўзбекистон Президенти Администрацияси ҳузуридаги Ахборот ва оммавий коммуникациялар агентлиги директори этиб тайинланганди.
