Ўзбекистонга салкам 20 кун ичида кириб келган 43 нафар йўловчида коронавирус аниқланди
Тошкент аэропортига 2020 йилнинг 25 декабридан 2021 йилнинг 13 январигача бўлган муддатда кириб келган 43 нафар йўловчида коронавирус аниқланди. Бу ҳақда «Uzbekistan Airports» АЖ Ахборот хизмати маълум қилди.
Фото: «Tez News»
Хабарга кўра, умумий ҳисобда 2020 йил 25 декабрдан 2021 йил 13 январга қадар Тошкент аэропортида 26 мингдан зиёд йўловчидан антиген экспресс тести олинган. Касалликка чалинганлар айни вақтда шифохонага жойлаштирилган.
Ҳозирда йўловчиларда ПЗР тестининг манфий натижаси тўғрисидаги таҳлил натижалари мавжудлигидан қатъий назар, улар ўз ҳисобидан халқаро аэропортларимизнинг чегара пункти ҳудудида экспресс тест топширишлари зарур. Тошкент халқаро аэропортида ҳам экспресс тест олиш жараёнлари амалга оширилмоқда.
Экспресс тест нархлари 2020 йил 25–28 декабрга қадар 150 минг сўм, 28 декабрдан бошлаб 95 минг сўм, талабалар учун 50 минг сўм миқдорида тўлов белгиланган. Экспресс тестнинг таҳлил натижалари 15 дақиқа мобайнида паспортларга штрих кодларини қўйиш орқали маълум қилинади.
Кўп ўринли самолётларни кутиб олишда тирбандликнинг олдини олиш учун йўловчилар оқимини терминалнинг 5 та жойидаги тест олиш тиббиёт қисмларига йўналтириш ташкил қилинган. Фуқаролар парвоздан бир неча кун аввал ПЗР тестини топшириш бўйича буюртма беришлари ҳам мумкин. Аэропортнинг биргина учиб келиш залида 4 та банкомат ва 2 та валюта айирбошлаш шахобчалари мавжуд.
Маълумот учун, Республика Махсус комиссияси баёнига мувофиқ, 2020 йил 25 декабрдан эътиборан коронавирус ва янги штамми кириб келиши ҳамда тарқалишининг олдини олиш мақсадида коронавирус инфекцияси антигенини аниқлаш учун хориждан мамлакатга келаётган шахслардан экспресс тест олиш мажбурий тартибда амалга оширилмоқда.
Аввалроқ Ўзбекистонга 3 январгача кириб келган 21 кишида коронавирус аниқлангани ҳақида хабар берилган эди.
