Фарғонада танишининг укасини Кореяга ишга жўнатишни ваъда қилиб, 8 минг долларга чув туширган фуқаро ушланди
Фарғона туманида 2017 йилнинг декабрь ойида танишидан фирибгарлик йўли билан 8 минг доллар олган фуқарога жиноят иши қўзғатилди. Бу ҳақда Фарғона вилояти ИИБ ахборот хизмати хабар берди.
Фуқаро М.М. таниши Ж.М.га 8 минг АҚШ доллари эвазига укаси Т.Ж.ни 2 ой муддатда Жанубий Кореяга ишлаш учун жўнатишни айтган. Сўнг берган ваъдасини бажармасдан, қўлга киритган пулларни ўз эҳтиёжларига сарфлаб юборган.
Ҳолат юзасидан Фарғона туман ИИБ ҳузуридаги тергов бўлими томонидан Жиноят кодексининг 168-моддаси 1-қисми билан жиноят иши кўзғатилиб, унга нисбатан суд томонидан қамоққа олиш тарзидаги эҳтиёт чораси қўлланилган.
Маълумот учун, Жиноят кодексининг 168-моддаси 1-қисмида кўрсатилган жиноятни содир этган шахс уч йилгача озодликдан маҳрум қилиш билан жазоланиши мумкин.
Аввалроқ Наманганда фуқароларни Кореяга ишга жўнатишини айтиб, 14 минг долларга чув туширган аёл қўлга олингани хабар қилинган эди.
