Қоракўл ҳокими 6,4 млрд сўмлик 2 та боғчадаги қурилиш ишларини кўздан кечирди (фото)

Бухоро вилояти Қоракўл тумани ҳокими умумий қиймати 6,4 миллиард сўм бўлган 2 та боғчадаги қурилиш ишларини кўздан кечирди. Бу ҳақда туман ҳокимлиги матбуот хизмати хабар берди.

Фото: Қоракўл туман ҳокимлиги матбуот хизмати

Маълум қилинишича, туман ҳокими Шерали Саломов сектор раҳбарлари ҳамроҳлигида «Бандбоши» ва «Дўрмон» МФЙларда барпо этилаётган 24- ва 25-мактабгача таълим ташкилотларининг қурилиш жараёнлари билан танишган.

Фото: Қоракўл туман ҳокимлиги матбуот хизмати

«Бандбоши» МФЙ ҳудудидаги 24-сон мактабгача таълим муасасасининг биноси 1968 йилда болалар боғчасига мослаштириб қурилган ва «Зилола» болалар боғчаси номи билан фаолият олиб борган.

Фото: Қоракўл туман ҳокимлиги матбуот хизмати

Мазкур маҳаллада мактабгача таълим ёшидаги болалар сони 270 нафар эканлиги қайд этилган. Қурилаётган 24-МТТ биноси 120 ўринга мўлжалланган ҳамда «Нур қурилиш порлоқ» масъулияти чекланган жамияти томонидан амалга оширилаётган қурилиш жараёнларига 3 миллиард 200 миллион сўм маблағ сарфланаётгани қайд этилган.

Фото: Қоракўл туман ҳокимлиги матбуот хизмати

«Дўрмон» МФЙ ҳудудидаги 25-сон мактабгача таълим муасасасининг эски биноси 1975 йилда қурилган. Мазкур маҳаллада мактабгача таълим ёшидаги болалар сони 243 нафар эканлиги қайд этилган. Барпо этилаётган 25-МТТ биноси 120 ўринга мўлжалланган ва «Бунёд–Шахзод–Файз» МЧЖ томонидан амалга оширилаётган қурилиш ишларига 3 миллиард 200 миллион сўм маблағ жалб қилинаётгани маълум қилинган.

Аввалроқ Ўзбекистонда уч йил ичида боғчалар сони 5 мингтадан салкам 15 мингтага етгани ҳақида хабар берилган эди. Кейинчалик Бўстон туманида янги хусусий болалар боғчаси ўз фаолиятини бошлагани ва Марҳаматда бир кунда учта янги боғча фойдаланишга топширилгани маълум қилинди.