«Халқимизга газ керак». Шавкат Мирзиёев газ экспортини қисқартириб, аҳоли эҳтиёжларини қондириш юзасидан кўрсатма берди

Шавкат Мирзиёев раислигида 16 декабрь куни ўтказилган видеоселектор йиғилишида газ экспортини қисқартириб, аҳоли эҳтиёжларини қондириш юзасидан кўрсатма берди. Бу ҳақда Президент матбуот хизмати хабар қилди.

Фото: Президент матбуот хизмати

Хабарга кўра, бугунги кунда газ таъминотида суткасига 20 миллион куб метр танқислик мавжуд. Оқибатда мингдан зиёд маҳаллада табиий газ босими пасайган.

«Газ тизими билан боғлиқ муаммолар бугун юзага келмагани, балки ўттиз йилдан бери бизни қийнаб келаётганидан барчамиз хабардормиз. Лекин буни баҳона қилишга ҳеч кимнинг ҳаққи йўқ. Халқимизга газ керак, уларнинг кўпчилиги бунинг учун тўловларни ўз вақтида ҳалол қилиб, тўлаб келмоқда», – дейди Президент.

Шунингдек, Шавкат Мирзиёев газ экспортини қисқартириб, аввало аҳоли эҳтиёжларини қондириш юзасидан кўрсатма берган. Таъкидланишича, бунинг ҳисобига кунига 7–8 миллион куб метр табиий газ қўшимча равишда ҳудудларга йўналтирилаган. Бундан ташқари, аҳоли эҳтиёжини қоплаш учун яна 217 минг тонна суюлтирилган газ етказиб бериш вазифаси қўйилган.

Қайд этилишича, самарасиз ишлаётган 25 та конни инвесторларга «риск-сервис контракт» шартлари асосида бериб, табиий газ ишлаб чиқаришни кўпайтириш мумкинлиги айтилган. Шунингдек, йиғилишда жойларда кўмир билан боғлиқ эътирозлар ҳам борлиги, аҳоли ва ижтимоий объектлар учун ажратилган маҳаллий кўмирнинг 60 минг тоннаси ҳали эгаларига етказиб берилмагани ҳам кўрсатиб ўтилган.

Aввалроқ Шавкат Мирзиёев ижтимоий тармоқлардаги энергетика соҳаси билан боғлиқ муаммолар ўринли эканини таъкидлагани хабар қилинган эди.