Бухорода хориждан юк ташувчи машинани енгил автомобиль сифатида қайд этиб олиб келганлардан 200 млн сўмдан ортиқ тўлов ундирилди
Бухоро вилоятида масъулияти чекланган жамиятлардан бирининг хориждан юк ташиш учун мўлжалланган автотранспорт воситасини ҳужжатларда енгил автомашина сифатида қайд этиб олиб келганлиги аниқланди. Бу ҳақда «ЎзА» хабар берди.
Маълум бўлишича, вилоятда фаолият олиб бораётган масъулияти чекланган жамиятлардан бирининг номига хорижий давлатдан олиб келинган «Toyota Tundra Edition 1794» русумли автотранспорт воситаси ҳужжатларда енгил автомашина сифатида қайд этилган. Бироқ Бухоро вилояти божхона бошқармаси Коррупцияга қарши курашиш ва ўз хавфсизлик бўлими ҳамда Ташқи иқтисодий фаолиятда нотариф тартибга солишни назорат қилиш ва божхона экспертизаси гуруҳи ходимлари томонидан ўрганиш жараёнида аслида мазкур автомашина «пикап», яъни юк ташиш учун мўлжалланган автотранспорт воситаси эканлиги аниқланган. Натижада ушбу иш учун давлат фойдасига 258,3 миллион сўм қўшимча божхона тўловлари ундириб олинган.
«Ҳозирда юқоридаги ҳолат юзасидан божхона органлари томонидан суриштирув ҳаракатлари давом эттирилмоқда», — дейилади хабарда.
Аввалроқ Ўзбекистонга 2,7 миллиард сўмлик дори-дармонларни сомон остига яшириб олиб кирмоқчи бўлган шахслар Наманганда ушлангани, Ўзбекистонга ноқонуний йўл билан киритилган 5,4 килограмм заргарлик буюмлари божхонада тўхтатиб қолингани ҳамда Самарқандда 48 миллион сўмдан ортиқ дори воситаларининг ноқонуний савдосига чек қўйилгани ҳақида хабар берилганди.
