Шавкат Мирзиёев АҚШ қуролли кучлари марказий қўмондонлиги қўмондонини қабул қилди
Шавкат Мирзиёев 20 октябрь, сешанба куни Ўзбекистонга амалий ташриф билан келган Америка Қўшма Штатлари Қуролли кучлари марказий қўмондонлиги қўмондони генерал Кеннет Маккензини қабул қилди. Бу ҳақда Президент матбуот хизмати хабар берди.
Фото: Президент матбуот хизмати
Маълум қилинишича, суҳбат чоғида Ўзбекистон—АҚШ муносабатлари ва минтақавий кун тартибининг долзарб масалалари муҳокама қилинган. Хавфсизлик ва барқарорликка таҳдидлар ҳамда глобал хатарларга қарши курашиш мавзуларига алоҳида эътибор қаратилган.
Фото: Президент матбуот хизмати
Хусусан, Афғонистонда тинчлик жараёнини қўллаб-қувватлаш ҳамда ушбу мамлакатнинг иқтисодий тикланишига амалий кўмак кўрсатиш юзасидан фикр алмашилган. Шунингдек, икки томонлама ҳарбий ва ҳарбий-техник ҳамкорлик масалалари ҳам кўриб чиқилган.
Фото: Президент матбуот хизмати
Генерал Маккензи Ўзбекистон Президентига учрашув учун самимий миннатдорлик билдириб, АҚШ Ўзбекистон билан стратегик шерикликни мустаҳкамлаш, ҳамкорликни кенгайтириш борасида қатъий эканини таъкидлаган.
Аввалроқ Шавкат Мирзиёев маслаҳатчиси Сума Чакрабарти билан Ўзбекистонни ривожлантириш йўлларини муҳокама қилганди. Шунингдек, Шавкат Мирзиёев коронавирусга чалинган Дональд Трамп ва унинг рафиқасига соғлик тилаб, мактуб йўллагани хабар қилинди.
