Олтиариқда фуқаронинг 10 қути тамаки маҳсулоти, телефон ва 810 минг сўм пулини ўғирлаган аёл қўлга олинди
Фарғона вилояти Олтиариқ туманида фуқаронинг сумкасидан 10 қути тамаки маҳсулоти, 1 та телефон ва 810 минг сўм пулини ўғирлаган аёл қўлга олинди. Бу ҳақда Фарғона вилояти ИИБ ахборот хизмати хабар берди.
Фото: Фарғона вилояти ИИБ ахборот хизмати
Олтиариқ туманида 14 июль куни фуқаро Д.Х. ИИБга мурожаат қилиб, унда 7 июль куни номаълум шахс туманда жойлашган деҳқон бозорида сумкасида бўлган 10 қути «Kеnt» номли тамаки маҳсулоти, «Maxvi c3» русумли телефони ва жами 810 000 сўм пулини киссавурлик йўли билан яширин равишда ўғирлаб кетганини билдирган.
Мазкур ҳолат юзасидан Олтиариқ тумани ИИБ ҳузуридаги тергов бўлими томонидан Жиноят кодексининг 169-моддаси 2-қисми «а» банди билан жиноят иши қўзғатилган.
Олиб борилган тезкор қидирув ҳаракатлари давомида ушбу жиноятни М.З. исмли аёл содир этганлиги аниқланиб, тергов ҳаракатлари олиб борилмоқда.
Маълумот учун, Жиноят кодексининг 169-моддаси 2-қисмида кўрсатилган жиноятни содир этган шахс беш йилгача озодликдан маҳрум қилиш билан жазоланади.
Аввалроқ Қувада танишининг уйидан 1 қоп картошка ва 450 минг сўмлик телефон аппаратини ўғирлаган шахс қўлга олингани хабар қилинган эди.
