«Отам ўзидан 30 ёш кичик аёлга уйланган». Отаси оқ қилган ўғил можаролар сабабини айтиб берди
«Очиқчасига гаплашамиз» ток-шоусида йигит отаси уни оқ қилгани, оиласида келиб чиққан можаролар сабаблари, шунингдек, ҳозирда унга ҳамма қарши экани, аммо у отаси билан ярашиш нияти борлигини айтди.
Йигитнинг сўзларига кўра, асосий айбдор — ўгай онаси. Етти йил аввал у Россияда бўлган вақтда 75 ёшга тўлган отаси 44 ёшли аёлга уйланган. Бу вақтда онасининг вафотига 6 ой тўлган эди. Таъкидлашича, йигит 21 ёшидан буён Россияда ишлаб келган ва топган пулларини отасига жўнатган. Шунингдек, унинг 5 нафар опа, 1 нафар синглиси ва акаси бор. Aкаси ва опаларининг 4 нафари унга ўгай (ота бир, она бошқа). Aкаси уйнинг орқа томонидаги алоҳида уйда яшайди.
Йигит икки нафар опаси ва синглисининг тўйини ўзи қилган, барча харажатларини ўзи қоплаган. Йигит дастлаб отасига уйланмоқчилигини, ортиқ Россияга кетмаслигини маълум қилган. У уйлангач, хотини ва ўгай онаси ўртасида ҳам жанжаллар, келишмовчиликлар чиқа бошлаган. Баъзан ўгай онаси келинни 3 маҳал овқат ейишини ҳам танқид қилган ва овқатланишдан чеклаган.
Отаси билан бўлган суҳбатда у ҳеч қачон ўғлини кечирмаслиги, уни оқ қилганини қайта-қайта таъкидлаган:
«Менга қўл кўтаради, юзларимни қонатиб ҳам юборган. Ҳатто юзимга туфлаб юборган. Юзимга уриб, тупуриб юбордими, энди умуман тан олмайман. Мени ҳурмат қилмадими, тан олмайман», — дейди унинг отаси.
Опасининг сўзларига кўра, йигит отасига умуман меҳрсиз, ҳатто опалари учун ҳам ҳеч нима қилмаган, фақат синглиси учун ёрдам қилган. Шунингдек, у ер ҳам талаб қилган. Укаси эса бунга жавобан шундай деди:
«Ўзи битта ҳовли, ўртадан бўлиниб, девор қўйилган, уёғида акам яшайди. Aкам ҳам ажрашган, 4 нафар қизи бор, қизларининг ҳаммаси Россияда яшайди. Aкам жиянларим келиб ер талаб қилаётганини айтди. Мен ‘ҳўп, майли, уёқни сотиб, бу уйда яшайверасизлар’ деганман».
Қўшимча тарзда, опалари унинг марҳум онасига бемеҳр бўлганини, ҳатто унга ҳомиладор бўлган вақтда кўчага олиб чиқиб қўйган ҳолатлар бўлганини ҳам эслатиб, туғруқхонадан ҳам тоғаси олиб чиққанини таъкидлаган. Шу сабабли унга тоғасининг фамилияси қўйилган.
У можароларга барҳам бериш учун маҳалла оқсоқоли, имом-хатиб ва маҳалла фаолларидан 3–4 нафарини олиб кирган. Улар йигитдан муаммо нимадалигини сўраганида ўгай онасининг умуман ёқмаслигини билдирган. Нима сабабдан ёқмаслигини сўраганида эса аёл умуман оиласига тўғри келмаслигини, унинг ҳатто нос чекишини ҳам маълум қилган.
Йигитниг отаси билан гаплашмаганига 2 йил бўлган. Орада можаролардан чарчагани сабаб ўзини осмоқчи ҳам бўлган.
«Отам билан гаплашмаганимга 2 йил бўлди. У билан юракдан гаплашишни хоҳлайман. Ҳар куни у дуо қилиш ўрнига ‘оқ қилдим’, дейди. Унинг назарида менинг айбим — аёлини чиқиштирмаганим. Мен унга ‘бошқа аёлни олиб келайлик, бу аёл бизга тўғри келмайди’, дедим. Бу балки унга ёқмаган», — дейди йигит.
Кадр: YouTube
Шундан сўнг экспeртлар йигитни отаси билан яраштириш учун уларнинг уйига борган. Бироқ ота уни икки дунёда ҳам кечирмаслигини айтган. Ўгай она эса гаплашишни истамаган ҳам. Йигит отасидан тиз чўкиб, ундан кечирим сўраган. Шундан сўнг ота кечирганини айтиб, ўғлини бағрига босган.
