“Yuksalish” umummilliy harakatiga yangi rais saylandi
Oliy Majlis Senati raisi Tanzila Norboyeva boshchiligida 27-iyul, dushanba kuni bo‘lib o‘tgan “Yuksalish” umummilliy harakati ta’sischilari yig‘ilishida Oliy Majlis Qonunchilik palatasi deputatlari orasidan Bobur Bekmurodov yangi rais etib saylandi. Bu haqda “Yuksalish” umummilliy harakati matbuot xizmati xabar berdi.
![](/wp-content/uploads/2020/07/yengi-rais.jpg)
Foto: “Yuksalish” umummilliy harakati
Bobur Bekmurodov Parlament quyi palatasining Demokratik institutlar, nodavlat tashkilotlar va fuqarolarning o‘zini o‘zi boshqarish organlari qo‘mitasi a’zosi hisoblanadi.
Bobur Bekmurodov 1985-yil 5-yanvarda Qashqadaryo viloyatining Yakkabog‘ tumanida tug‘ilgan. U O‘zbekiston davlat jahon tillari universiteti, Toshkent moliya institutini tamomlagan. 2005—2006-yillarda AQShning O‘zbekistondagi “Partnership for Academic development” (“Akademik rivojlanish bo‘yicha hamkorlik”) dasturi tinglovchisi, 2018-yilda “The John Smith Trust” (Buyuk Britaniya) menejment dasturi tinglovchisi bo‘lgan.
Eslatib o‘tamiz, harakatning avvalgi raisi Akmal Burhonov 14-iyuldagi Prezident qarori bilan Korrupsiyaga qarshi kurashish agentligi direktori etib tayinlangan. Agentlik direktori maqomi bo‘yicha vazirga tenglashtirilgan.
Avvalroq Akmal Burhonovning deputatlik vakolati muddatidan avval tugatilgani haqida xabar berilgan edi.