Ўзбекистонда иккинчи ва учинчи АЭС қурилиши режалаштирилмоқда
Президент Шавкат Мирзиёев атом энергетикасини ривожлантиришга катта эътибор қаратилаётганини таъкидлади
Ўзбекистонда иккинчи ва учинчи атом электр станцияларини қуриш режалаштирилмоқда, деб маълум қилди Президент Шавкат Мирзиёев ёнилғи-энергетика тармоғи инвесторлари билан очиқ мулоқотда.
Таъкидланишича, мамлакатда уран ишлаб чиқариш ҳажми ошиб бормоқда. Бу соҳага катта сармоя киритилиб, етарли тажриба ва имкониятлар тўпланган.
Биринчи атом электр станцияси қурилишини бошладик. Иккинчи ва учинчисини қуриш бўйича ҳам режаларимиз бор. Эртага янги ҳамкорларимиз ва инвесторлар билан иккинчи атом электр станциясини қуриш масаласини муҳокама қиламиз, — деди давлат раҳбари.
Eслатиб ўтамиз, илк АЭС Жиззах вилояти Фориш туманида Россия билан ҳамкорликда барпо этилмоқда. Август ойида Шавкат Мирзиёев Ўзбекистонда иккинчи АЭС лойиҳаси бўйича ҳам катта тайёргарлик кўрилаётганини билдирган эди.
