Шарқшунос олим Андрей Кубатин коронавирусдан вафот этди
Тарихчи, шарқшунос олим Андрей Кубатин 29 октябрь, пайшанба куни коронавирус асоратларидан вафот этди. Бу ҳақда марҳумнинг яқинлари хабар берди.
Фото: Андрей Кубатин / Facebook
Андрей Кубатин 2019 йил декабрдан буён Ўзбекистон Фанлар академияси миллий археология марказида фаолият юритиб келган. Олим туркий халқлар тарихига оид учта монография ва саксондан ортиқ илмий мақолалар ёзган. Шунингдек, Ўзбекистон ва туркийлар тарихини ўрганишда катта ҳисса қўшган инсон ҳисобланади.
Маълумот ўрнида, Aндрей Кубатин 2017 йилда Жиноят кодексининг 157-моддаси (Давлатга хиёнат қилиш) билан айбланиб, беш йилга озодликдан маҳрум этилган. Олим ўзининг айбсизлигини исботлаш учун 2,5 йил курашган ва 2019 йил 26 сентябрда Андрей Кубатин Жиноят ишлари бўйича Тошкент вилояти суди аппеляция инстанциясида реабилитация қилинган ҳамда суд залидан озодликка чиқарилган.
Аввалроқ Қишлоқ хўжалиги фанлари номзоди Акбар Алиев, Ўзбекистон Журналистлари ижодий уюшмаси раиси Саъдулла Ҳакимов ҳамда Ўзбекистоннинг биринчи ва охирги давлат котиби Раҳим Ражабовнинг вафот этгани ҳақида хабар берилганди.
