Сингапурда туғилган чақалоқда коронавирусга қарши иммунитет аниқланди
Ҳомиладорлик даврида коронавирусга чалиниб, соғайган сингапурлик аёл CОVID-19’га қарши иммунитетга эга ўғил фарзандни дунёга келтирди. Бу ҳақда «Straits Times» хабар берди.
Фото: «Straits Times»
Маълум қилинишича, Селин Нг-Чен ҳомиладор бўлган вақтининг 10-ҳафтасида шифокорлар унда коронавирус инфекциясини аниқлаган. 31 ёшли бемор Сингапурда ҳомиладорлик вақтида коронавирусга чалинган камдан-кам аёллардан бири бўлган. Унга юққан инфекция енгил даражада бўлган. Шу сабабли у 2,5 ҳафтадан сўнг касалхонадан чиққан.
Нг-Чен ноябрь ойининг бошида ўғиллик бўлган. Унга Олдрин деб исм қўйган. Чақалоқда коронавирус аломатлари аниқланмаган. Болада аниқланган антитаналар онадан ўтганми ёки чақалоқнинг организмида ишлаб чиқилганми ҳозирча номаълум.
«Бизга қараган педиатрнинг айтишича, менда CОVID-19 антитанaчалари йўқ бўлиб кетган, аммо Олдринда улар мавжуд. Шифокорим ҳомиладорлик пайтида унга антитаначаларим ўтган, деб ҳисоблайди.
Мен ҳомиладорлик пайтида CОVID-19’га чалинган Сингапурдаги кам сонли оналардан бириман. Шу сабабли, тадқиқотнинг бир қисми бўлишга розилик бердим. Чунки бу жуда муҳим, шунда биз кўпроқ нарсани билиб олишимиз ва вирусга қарши яхшироқ курашишимиз мумкин», — дейди аёл.
Аввалроқ Коронавирусга қарши «Pfizer» вакцинасини дунё мамлакатларига тарқатиш бошлангани ҳақида хабар берилган эди. Бундан ташқари, АҚШнинг «Pfizer» компанияси яратган COVID-19’га қарши вакцинанинг салбий томони маълум бўлгани, шундан сўнг компания фавқулодда фойдаланиш учун ўз вакцинасини озиқ-овқат ва фармацевтика идорасида рўйхатдан ўтказиш учун мурожаат қилгани ҳақида хабар берилган.
