Turizmni rivojlantirish departamenti Minorai kalon qurilish tarixi va asl nomi haqda ma’lumotlarni taqdim etdi
Buxoro viloyati turizmni rivojlantirish departamenti Minorai kalonning asl nomi va qurilish tarixi haqda ma’lumot berdi. Unga ko‘ra, minora dastlab sahroda yo‘lini yo‘qotgan odamlarga mayoq sifatida qurilgan.
Foto: Buxoro viloyati turizmni rivojlantirish departamenti axborot xizmati
“O‘zbek xalqining tarixi yozma manbalar bilan bir qatorda osori atiqalarida ham muhrlanib qolgan. Kitoblar o‘qiladigan dalillar bo‘lsa, yodgorliklar ko‘riladigan dalillardir. Osori-atiqalar tarixini bilish ham o‘tmish haqidagi taassurotlarimizni boyitadi va aniqlashtiradi. Xalqni tarixiy, moddiy madaniy merosni o‘rganish bilan tarbiyalash muhim ahamiyatga ega. Chunki har bir katta-kichik yodgorlik o‘zbek xalqi va o‘zbek davlatlari tarixidagi muhim bir voqea yoki sana bilan bog‘liq yoki bo‘lmasa, davlat ahamiyatiga molik biror zarurat tufayli bunyod etilgan.
Bu fikrimizning isboti uchun Buxoroi sharifda uch davrda — XII, XVI va XX asrlarda qurilgan uchta yodgorlikni misol qilib keltiramiz. Bular yaxlit bir me’moriy majmuani tashkil etuvchi, Minorai Kalon, Jo’me masjid, Mir Arab va Saidolimxon madrasalaridir. Bu muqaddas yer aslida tarixiy joy hisoblanib Buxoro Arkidan sal janubi-sharqdadir. Ilk bor bu yerda milodiy 713-yili amir Qutayba ibn Muslim davrida jo’me masjidi qurilgan. Biroq yillar o‘tishi bilan bu bino vayrona holiga kelgan. 1102—1130-yillarda qoraxoniylar davlatini boshqargan amir Arslonxon 1121-yilda xuddi shu vayrona masjid o‘rnida yangi va ulug‘vor jome masjidini qurdirdi. Buxoro atrofidagi suvsiz sahrolarda karvonlar yo‘ldan adashib halok bo‘lish hollari uchrab turardi. Shuning oldini olish maqsadida Arslonxon shaharda baland bir inshoot qurdirishni niyat qiladi. Inshoot loyihalari bo‘yicha tanlov e’lon qilishadi. 1124-yili mashhur me’morlar tomonidan taqdim etilgan loyihalar bilan Arslonxon shaxsan o‘zi tanishadi va usta Baqoning loyihasini ma’qullaydi. Shu tariqa 1124-yilning 21-mart kuni – Yilboshi bayram ayyomida minora qurilishiga oq fotiha beriladi va birinchi g‘ishtni — tamal toshini xoqon Arslonxonning o‘zi qo‘yadi. Qurilish uch yarim yilcha davom etadi. 1127-yili balandligi 47 yarim metr bo‘lgan minora qurib bitkaziladi.
Uning eng yuqori qismida (ya’ni mezana qismida) 16 ta doirachalar qo‘yilib, tunda hamma darichalar yonida shamchiroqlar yonib turgan. Natijada tunlari 50—60 chaqirim masofadan chiroqlar yorug‘ini mo‘ljal qilib savdo karvonlari Buxoroga adashmay kelgan. Buxoroning Buyuk ipak yo‘lidagi yirik savdo markazlaridan biri bo‘lib qolishida bu minoraning ahamiyati kattadir.
Albatta, minoraning asosiy vazifasi – azon aytish – najotga chorlovdir. Minora bilan yonma-yon joylashgan jo’me masjidining muazzini har kuni besh marotaba shu minoraga chiqib azon aytgan. Shundan keyin shahardagi boshqa masjidlarda azon aytila boshlagan, namozxonlar ibodatga oshiqqan.
Foto: Buxoro viloyati turizmni rivojlantirish departamenti axborot xizmati
Minoraning yana bir vazifasi shuki, tashqi hujumdan o‘z paytida ogoh bo‘lish uchun durbin orqali tevarak-atrof kuzatib turilgan, bu uning harbiy ahamiyatga ham ega ekanligidir.
Minora nafosati, salobati, go‘zalligi, ajoyib naqshlarga boyligi bilan kishilarga zavq-shavq bag‘ishlagan. U, ayniqsa, chet elliklar — elchilar, savdogarlar, sayyohlarni ham maftun etgan. Bu hol o‘z navbatida davlatning kuch-qudrati, shukuhi va shavkatini, poytaxt Buxoroning dong‘ini olis-olislarga yetkazardi.
Sharqdagi birinchi uyg‘onish davrida, ya’ni VIII-XII asrlarda Buxoroda ko‘pgina buyuk obidalar qurilgan edi. Usta Baqo shu obidalardagi eng go‘zal naqshlardan ko‘chirma olib, minorada 24 ta katta-kichik halqalar yaratgan. Asosan, Chingizxon bosqini davrida qisman keyingi asrlarda buzilib ketib, bizgacha yetib kelmagan binolarning naqshlari shu minoradagina saqlanib qolgan. Shu bois bu minorani Buxoro me’morchiligining qomusi deyish mumkin.
Shunisi alohida tarixiy ahamiyatga egaki, minoraning eng yuqorigi halqalaridan birida naqshli g‘ishtlar bilan bo‘rtma qilib “Usto Baqo amali”, “Arslonxon minorasi” degan so‘zlar yozilgan. Binobarin, Minorai Kalonning asl nomi Arslonxon minorasidir. Xususan, 872 yashar ko‘hna Arslonxon minorasi 2019-yilda Shanxay hamkorlik tashkilotining “Sakkiz mo‘jizasi” sirasida e’tirof etilgani nafaqat, Buxoroi sharifning ramzi bo‘lib, qolaversa, xalqimiz, davlatchiligimiz va madaniyatimizning shukuhi bo‘lib dunyo ahlini maftun etib, yana ming asrlar qad ko‘tarib turajak”.
