Ўзбекистонда маҳаллий ҳокимликлар томонидан 380 дан ортиқ ҳужжат асоссиз яширилгани аниқланди

Коррупцияга қарши курашиш агентлиги томонидан жорий йилнинг ўтган даврида маҳаллий ижро этувчи ҳокимият органлари томонидан «яширинган» ёки «хизмат доирасида фойдаланиш учун» қабул қилинган қарор ва фармойишлар ўрганилди.

Таҳлиллар натижасига кўра, вилоят, туман ва шаҳар ҳокимликлари томонидан жами 1 907 та қарор ва фармойиш ушбу асосларда қабул қилингани аниқланди. Дастлабки ўрганишлар жараёнида мазкур ҳужжатларнинг 386 таси асоссиз равишда яширилгани маълум бўлди, — дейилади хабарда.

Яширилган қарорларнинг 68 таси ташкилий тузилмани тасдиқлаш, 46 таси маблағ ажратиш, 34 таси рағбатлантириш, 156 таси лавозимга тайинлаш ҳамда 82 таси бошқа масалаларга оид ҳужжатлардан иборат.

Очиқланмаган ҳужжатлар сони бўйича энг юқори кўрсаткичлар: Фарғона (67 та, 44%), Хоразм (32 та, 39%), Бухоро (58 та, 37%), Қашқадарё (41 та, 26%) ва Самарқанд (38 та, 15%) вилоятлари ҳиссасига тўғри келади.

Хусусан, агентлик томонидан Қорақалпоғистон Республикаси Вазирлар Кенгаши, вилоятлар ҳамда Тошкент шаҳар ҳокимликларига асоссиз яширилган 68 та қарор ва фармойишларни очиқлаш ва мазкур қонунбузилишларнинг келиб чиқишига сабабчи бўлган масъул ходимларга нисбатан тегишли чора кўриш юзасидан тақдимномалар киритилди.

Ҳозирда асоссиз деб топилган қолган ҳужжатлар бўйича ўрганиш ишлари давом эттирилиб, натижаларига кўра ҳар бир қарор ва фармойишга нисбатан белгиланган тартибда ҳуқуқий таъсир чоралари қўлланилиши билдирилди.