Трамп автомобиллар импортига 25 фоизлик тарифлар ҳақида эълон қилди
АҚШ президенти Доналд Трамп автомобиллар импортига 25 фоизлик божлар жорий этилишини маълум қилди, деб хабар бермоқда Bloomberg.
Бу АҚШда ишлаб чиқарилмайдиган барча автомобилларга тааллуқлидир, дея аниқлик киритди у. Тарифлар 2 апрелдан кучга киради. Трамп маъмурияти улар АҚШга йилига 100 миллиард доллар даромад келтиришини кутмоқда.
General Motors Co. ва Ford Motor Co. акциялари қиймати Трампнинг қарори фонида 5 фоиздан кўпроққа тушиб кетди.
Президентнинг айтишича, у автомобил ишлаб чиқарувчи «катта учталик» — Ford, General Motors ва Stellantis вакиллари билан янги божлар ҳақида гаплашган.
Агар бу ерда заводларингиз бўлмаса, уларни қуришингиз керак бўлади, чунки акс ҳолда бож тўланиши керак, бу жуда оддий, деди у.
Оқ уй матбуот котиби биринчи муовини Харрисон Филдснинг айтишича, 25 фоизлик тарифлар импорт қилинадиган енгил автомобиллар (седанлар, йўлтанламаслар, кроссоверлар, минивэнлар, фургонлар) ва енгил юк машиналари, шунингдек, двигателлар, трансмиссиялар ва электр қисмлари каби асосий автомобил қисмларига тааллуқлидир.
«Катта учталик» компанияларнинг аксарияти аллақачон Қўшма Штатларда заводларига эга ва шунингдек, ўзларининг эҳтиёт қисмлар ишлаб чиқариш бўлинмаларини Қўшма Штатларга қайтариш ниятида, деди у.
Аввалроқ, унинг яна янги божлар жорий қилмоқчилиги ҳақда хабар берган эдик.
