Трамп Мексика ва Канада маҳсулотларига бож тўловларини вақтинчалик бекор қилди
АҚШ президенти Дональд Трамп Мексика ва Канадан импорт қилинадиган айрим маҳсулотларга қўйилган бож тўловларини вақтинча тўхтатиш тўғрисида қарор қабул қилди. Бу ҳақда CBS News хабар берди.
Унга кўра, ушбу икки давлатдан келтириладиган товарларга бож ставкалари қайта кўриб чиқилмагунча, улар тўловдан озод этилади.
Трамп бу қарорни Мексика президенти Клаудия Шейнбаум билан телефон орқали мулоқотидан сўнг эълон қилди. Унинг сўзларига кўра, USMCA келишувида кўзда тутилган маҳсулотлар учун Мексикага бож тўлаш мажбурияти бекор қилинди. Бироқ, келишувда акс этмаган товарларга 25 фоизлик божлар сақланиб қолади.
Трампнинг таъкидлашича, ушбу чора АҚШ иқтисодиётига ижобий таъсир кўрсатиши ва халқаро савдо алоқаларини мустаҳкамлашга хизмат қилиши керак. Бироқ у бу қарор доимий эмаслигини ва зарур ҳолларда бож тўловлари қайта тикланиши мумкинлигини қайд этди.
Расмийлар мазкур ўзгариш АҚШнинг Канада ва Мексика билан тузилган янги савдо келишувларига боғлиқлигини билдирди.
