Чегарада рухсат этилган меъёрдан ортиқ валютани олиб чиқишга уриниш фош этилди
Тошкент вилояти «Ойбек» чегара божхона постида хорижий валютани ноқонуний олиб чиқишга уриниш фош этилди. Бу ҳақда вилоят божхона бошқармаси матбуот хизмати хабар берди.
Маълум қилинишича, 23 май куни қўшни давлатга пиёда ўтмоқчи бўлган йўловчининг ҳаракатлари божхона ходимларида шубҳа уйғотган ва у белгиланган тартибда шахсий кўрикдан ўтказилган.
Кўрик давомида йўловчи шимининг бел қисмида ва чўнтакларида божхона назоратидан яширилган, 2 млндан ортиқ Россия рубли миқдоридаги нақд хорижий валюта аниқланган.
Ҳозирда ушбу ҳолат юзасидан тегишли суриштирув ишлари олиб борилмоқда.
Эслатиб ўтамиз, амалдаги қонунчиликка кўра, жисмоний шахсларга божхона чегаралари орқали 100 млн сўмгача бўлган эквивалентдаги нақд хорижий валютани олиб чиқишга рухсат этилган.
