Кореяга ишлашга кетган Ўзбекистон фуқаролари норасмий ишлардан огоҳлантирилди
Кореяда E-7 ва E-9 визалари билан ишлаётган баъзи фуқаролар иш жойини норасмий ишларга алмаштириб, оғир вазиятларга дуч келмоқда. Ҳолат юзасидан Миграция агентлиги огоҳлантириш билан чиқди.
Агентлик фуқароларни ушбу қоидаларга амал қилишларини эслатди:
• ишдан бўшатилсангиз 1 ойда иш қидирувчи сифатида рўйхатдан ўтиш;
• 3 ойда янги иш берувчи топиб, расмий шартнома тузиш шарт.
Огоҳлантирилишича, агар ушбу ҳаракатлар бажарилмаса, катта жарима, ноқонуний мақом ва депортацияга олиб келиши мумкин.
Шунингдек, Миграция агентлиги билан тузилган шартномада ҳам «иш жойини келишмасдан тарк этмаслик» қатъий талаб экани белгиланган. У бузилса, жавобгарлик муқаррарлиги эслатилди. Қайд этилишича, жорий йилда 20 нафар фуқародан уч томонлама шартномани бузганлиги учун 660 млн сўм жарима ундирилган.
Депортация қилинганлар эса давлат берган барча имтиёзларни қайтариб бериши шарт бўлиб, бундан ташқари 1 йил давомида хорижга ташкилий тартибда юборилмайди.
SPAS базасида турганлар учун эса, агар улар шартнома олган бўлса, демак, иш берувчи томонидан танланган бўлади. Агар кимдир «танланишингга ёрдам бераман» деб пул талаб қилса, бу фирибгарликдан далолат экани таъкидланди.
