Қозоғистон хорижликлар учун электрон кириш рухсатномаларини жорий этишни бошлади
Биринчи босқичда рухсатноманинг йўқлиги мамлакатга киришни рад этиш учун асос бўлмайди. 2027 йил 1 июлдан бошлаб эса ушбу рухсатноманинг мавжудлиги мажбурий бўлади
Қозоғистонда 1 ноябрдан бошлаб мамлакатга кирувчи барча хорижликлар учун электрон рухсатномани расмийлаштиришнинг янги қоидаларини босқичма-босқич жорий этишга киришилди. Бу чора-тадбирлар мамлакат ҳукуматининг тегишли қарорида кўзда тутилган.
Электрон кириш рухсатномаси визасиз режим амал қиладиган мамлакатлар фуқаролари учун мўлжалланган бўлиб, улар ҳужжатни «QazETA» давлат рақамли платформаси орқали расмийлаштириш ҳуқуқига эга.
Янгилик шунингдек, туристик компаниялар, меҳмонхоналар ва хорижлик мутахассисларни таклиф қилувчи ташкилотларга ҳам тааллуқли бўлади.
Тизим босқичма-босқич жорий этилади:
• 2026 йил 1 ноябрдан: Оқтау халқаро аэропортида, шунингдек, Павлодар вилоятидаги «Урлютобе», Жамбил вилоятидаги «Аухатты», Туркистон вилоятидаги «Атамекен» ва Жетисў вилоятидаги «Нурлы Жол» автомобиль ўтказиш пунктларида;
• 2027 йил 1 январдан: Остона ва Олмаота аэропортларида;
• 2027 йил 1 мартдан: Давлат чегарасидаги қолган барча ўтказиш пунктларида.
«QazETA» платформаси 2026 йилнинг январидан бошлаб пилот режишида ишлай бошлади. Сервис Қозоғистон билан визасиз режим амал қиладиган давлатлар фуқароларини рўйхатдан ўтказиш учун мўлжалланган. Тизим орқали шунингдек, электрон визалар, электрон резидентлик ва чегарани кесиб ўтганлик ҳақидаги маълумотномаларни олиш мумкин.
Биринчи босқичда рухсатноманинг йўқлиги хорижликларга Қозоғистонга киришни рад этиш учун асос бўлмайди. 2027 йил 1 июлдан бошлаб эса ушбу талаб татбиқ этиладиган шахслар учун рухсатноманинг мавжудлиги мажбурий бўлади.
Рухсатномани бепул расмийлаштириш мумкин. У 180 календарь кун давомида амал қилади, бироқ ушбу давр ичида Қозоғистонда у орқали умумий ҳисобда 90 кунгача бўлиш мумкин.
Шу билан бирга, тасдиқловчи ҳужжатлар мавжуд бўлганда электрон рухсатномани расмийлаштиришдан озод этиладиган 29 тоифадаги шахслар кўзда тутилган. Хусусан, амалдаги Қозоғистон визаси эгаларига, дипломатларнинг муайян тоифаларига, 16 ёшдан кичик болаларга ва 65 ёшдан катта шахсларга ETA талаб қилинмайди.
