Тошкентда эркак иккинчи хотинини ўлдириш учун $10 минга киллер ёллади

Тошкентда ҳуқуқни муҳофаза қилувчи органлар қотилликка уринишнинг олдини олди, деб хабар беради пойтахт ИИББ матбуот хизмати.

Маълумотларга кўра, 41 ёшли эркак узининг хотинини ўлдириш учун киллер ёллашга қарор қилган. Унга 10 минг доллар тўлашни ваъда қилиб, 2 минг долларини аванс сифатида берган. Қолган маблағни эса «иш» бажарилгандан сўнг тўлашни режалаштирган.

Гумонланувчига қотиллик усулини танлаш таклиф қилинганда, у «бўғишни» танлаган.

Вазиятга ҳуқуқни муҳофаза қилувчи органлар аралашган. Улар ижрочи ва жабрланувчини ҳамкорлик қилишга кўндириб, қотилликни саҳналаштирган.

Буюртмачи ва ижрочи қолган маблағ ҳамда иккинчи аёлга тегишли Tracker автомобилини топшириш пайтида қўлга олинди.

Гумонланувчи айтишича, унинг икки нафар аёли бўлган. У иккинчисини таъминлаб келган, аммо унинг сўзларига кўра,  унга «доим камлик қилган». Ярим йил олдин бу ҳақда биринчи аёли билиб қолган ва у муносабатни тўхтатмаса, болалари билан бирга тўртинчи қаватдан ўзини ташлаш билан таҳдид қилган.

Мазкур ҳолат юзасидан жиноят иши қўзғатилган, гумонланувчилар қамоққа олинган. Тергов ҳаракатлари олиб борилмоқда.