Ўзбекистонда фармацевтика тармоғида ишлаб чиқариш ҳажмини 8,5 трлн сўмга етказиш режалаштирилмоқда

Президент Шавкат Мирзиёев фармацевтика соҳасида ишлаб чиқаришни рағбатлантириш ва илмий-тадқиқот ва ишланмаларни такомиллаштиришга қаратилган қарорни имзолади, деб ёзади Norma.

Хусусан, 2026 йилдаги асосий мақсадли кўрсаткичлар:

• ишлаб чиқариш ҳажмини 8,5 трлн сўмга етказиш;

• 1 миллиард долларлик истиқболли инвестиция лойиҳаларини шакллантириш ва 800 миллион долларлик янги лойиҳаларни ишга тушириш;

• маҳсулот ва хизматлар экспортини 300 млн долларга етказиш;

• 350 турдаги янги маҳсулотларни ўзлаштириш;

• Tashkent Pharma Park инновацион илмий-техник фармацевтика кластери ҳудудини кенгайтириш орқали ҳудудни биотехнологик ва фарматсевтик тадқиқотлар ва ишланмалар хабига – BioPharma City га айлантириш.

Оригинал препаратга патентнинг амал қилиш муддати тугаганидан кейин 1 йил ичида препаратлар ишлаб чиқаришни бошлаган ишлаб чиқарувчиларга Фармацевтика тармоғини қўллаб-қувватлаш ва ривожлантириш жамғармаси маблағлари ҳисобидан технологияларни ўтказиш харажатларининг 50%, бироқ $50 мингдан кўп бўлмаган миқдорда ёки маҳсулотни яратиш бўйича илмий тадқиқотлар харажатларининг 50%, бироқ $100 мингдан кўп бўлмаган миқдорда қоплаб берилади.

2040 йилга қадар фармацевтика маҳсулотларини ишлаб чиқариш, доривор ўсимликларни етиштириш ёки уларни қайта ишлашга қаратилган инвестиция лойиҳаларини амалга оширувчи корхоналар:

• инвестиция лойиҳалари амалга оширилаётган ер участкалари бўйича ер солиғидан уларни амалга ошириш бошланган пайтдан эътиборан 3 йил муддатга (агар ушбу маҳсулотларнинг жами даромаддаги улуши камида 60% ташкил этса);

• инвестиция лойиҳалари доирасида фойда солиғидан, шунингдек, инвестиция лойиҳалари доирасида қурилган кўчмас мулк объектлари фойдаланишга топширилган пайтдан эътиборан 3 йил муддатга мол-мулк солиғидан озод қилинади.

2028 йил 1 январдан:

• биологик фаол қўшимчаларга рухсатнома беришда хавфларни таҳлил қилиш ва критик назорат нуқталари тизимини (HAАCP) жорий этиш мажбурий бўлади;

• биологик фаол қўшимчалар мажбурий рақамли маркировкаланади.

Бундан ташқари, Ўзбекистон кимё-фармацевтика илмий-тадқиқот институти, Тошкент вакцина ва зардоблар илмий-тадқиқот институти ҳамда «Шарқ табобати» илмий-тадқиқот институти негизида Миллий биофармацевтика илмий-тадқиқот институти ташкил этилади.

2026/2027 ўқув йилидан бошлаб тажриба-синов тариқасида Абу Али ибн Сино номидаги ихтисослаштирилган мактаб негизида Фармацевтика техник университети билан ўзаро интеграция асосида STEM модели бўйича 5 йиллик дастурлар асосида биология фанлари бўйича таълим дастурлари жорий этилади.