Самарқанд вилояти ИИБ тезкор ходими 10 минг доллар билан ушланди
Самарқанд вилояти ИИБ тезкор ходими тезкор тадбирда ушланган. Бу ҳақда ЎзА хабар берди.
Маълум қилинишича, ҳуқуқни муҳофаза қилувчи органлар томонидан ўтказилган тезкор тадбирда Самарқанд вилояти ИИБ ЖҚХ ЖҚБ катта тезкор ходимининг ноқонуний хатти-ҳаракатига чек қўйилган.
Тезкор ходим ўзининг мансабдор танишлари орқали Самарқанд шаҳар ИИО фаолиятини мувофиқлаштириш бошқармаси ҳузуридаги Тергов бўлими иш юритувида бўлган Жиноят кодексининг 273-моддаси 3-қисми билан қўзғатилган жиноят ишида айбланувчилар сифатида ўтаётган икки шахсга ёрдам беришни ваъда қилган. У жиноят ишининг 31 ёшли шахсга тегишли қисмини Жиноят-процессуал кодексининг 83-моддасига асосан тугатиш ҳамда 22 ёшли фуқарога нисбатан эса уй қамоғи эҳтиёт чорасини қўллаган ҳолда уни озодликда қолдириш эвазига 10 минг доллар олган вақтида ушланган.
Ҳозирда тезкор ходимга нисбатан Жиноят кодексининг 25, 168-моддаси (Фирибгарлик) 3-қисми “а” банди ва 28, 211-моддаси (Пора бериш) 2-қисми “б” банди билан жиноят иши қўзғатилиб, тергов ҳаракатлари олиб борилмоқда.
