Тошкентда «Ҳудудгазтаъминот» ва «Технопарк» мансабдор шахслари 19 млрд сўмни ўзлаштиришда гумонланмоқда
Маблағлар гўёки электрон газ ҳисоблагичларига техник хизмат кўрсатиш учун ажратилган
Тошкентда бюджет маблағларини ўзлаштириш ҳолати аниқланди, деб хабар бермоқда Бош прокуратура ҳузуридаги Департамент матбуот хизмати.
Хусусан, ўтказилган терговга қадар текширувда «Ҳудудгазтаъминот» АЖ ва «Технопарк» МЧЖнинг масъул шахслари ва бошқалар ўзаро тил бириктириб, гўёки электрон газ ҳисоблагичларига техник хизмат кўрсатиш мақсадида 19 млрд сўмлик бюджет маблағларини ўзлаштириш ёки растрата қилиш йўли билан талон-торож қилганликлари аниқланган.
Шунингдек, «Технопарк» МЧЖ томонидан ишлаб чиқарилган ва «Ҳудудгазтаъминот» АЖ томонидан истеъмолчиларга ўрнатилган 273 дона газ ҳисоблагич кўрсаткичларининг кам ҳисобланганлиги натижасида давлат ва жамият манфаатларига 861,1 млн сўмлик зарар етказганликлари аниқланган.
Мазкур ҳолат юзасидан Жиноят кодексининг тегишли моддалари билан жиноят иши қўзғатилиб, тергов ҳаракатлари ўтказилмоқда.
