Тошкентда автобус ҳайдовчилари йўловчи талашиб, муштлашгани юзасидан маълумот берилди — видео

Ижтимоий тармоқларда автобус ҳайдовчилари «клиент» талашиб, уришиб кетгани акс этган видео тарқалган эди. Ушбу воқеа юзасидан «Тошшаҳартрансхизмат» расмий муносабат билдирди.

Кадр: Telegram

Маълум қилинишича, ушбу воқеа 2019 йил январь ойида Тошкент шаҳри, Олмазор тумани Қорақамиш 2/4 даҳасидаги автошоҳбекатда содир бўлган.

Ўзаро муштлашган ҳайдовчилар «18-Автобус саройи» тасарруфидаги 87-сонли йўналишда хизмат кўрсатиб келган. Ҳайдовчилар автобус шоҳбекатига етиб келишган заҳоти, 87-сонли автобус ҳайдовчи А.С. ҳамкасби Ш.Э. автобусига чиққан. Уни ҳақоратлаб, жанжал юзага келтириб, ўртада муштлашув содир бўлган.

Ушбу ҳолат «18-Автобус саройи» раҳбарияти томонидан ишчи суриштирув ташкиллаштириб, жанжалнинг келиб чиқишига 87-сонли йўналиш ҳайдовчиларнинг ўзаро муштлашувига ҳаракатланиши учун белгиланган жадвалнинг бузилиши сабаб бўлганлиги аниқланган.

Шундан сўнг, «18-Автобус саройи» томонидан ҳайдовчи Ш.Э. ва А.С. билан тузилган меҳнат шартномаси бекор қилинган.

Хабарда юқорида келтирилган иккала ҳайдовчилар 2019 йилдан буён «18-Автобус саройи»да хизмат кўрсатмаслигини маълум қилинган.

Аввалроқ Ўзбекистонда вилоят ва туманларда ҳам автобус йўналишлари учун автоматлаштирилган тўлов тизими жорий этилиши ва Тошкентда 11 январдан 8- ва 132-йўналишдаги автобуслар ҳаракати тўхтатилиши хабар қилинган эди.

Шунингдек, Самарқандда автобус юк машинаси билан тўқнашиши оқибатида ағдарилиб кетгани маълум қилинган.