Ўзбекистонда нақд валютани декларациясиз олиб чиқиш чегарасини ошириш режалаштирилмоқда

Уни 10 минг долларга тенг миқдорда белгилаш режалаштирилмоқда

Ўзбекистонда божхона декларациясини тўлдирмасдан нақд валютани олиб чиқиш чегарасини 10 минг долларга тенг миқдорда белгилаш режалаштирилмоқда. Бу ҳақда президент Шавкат Мирзиёев фармонида сўз боради.

Ҳужжатда фақат ушбу суммадан ошгандагина декларация талаб қилинадиган тизимни яратиш таклиф этилмоқда. Масъул идораларга қонун лойиҳасини тайёрлаш ва 2027 йил декабрига қадар Вазирлар Маҳкамасига киритиш топширилди.

Таъкидлаш жоизки, Ўзбекистонда 2023 йил сентябрь ойидан буён 100 млн сўмгача бўлган миллий ёки хорижий валютадаги нақд пулларни йўловчи божхона декларациясини тўлдирмасдан олиб чиқиш мумкин. 100 млн сўмдан ортиқ сумма эса декларацияланиши шарт.