АҚШ ўз ихтиёри билан кетган ноқонуний муҳожирларга $1000 тўлайди
Эндиликда ўз ихтиёри билан мамлакатни тарк этган муҳожирларга $1000 миқдорида стипендия берилади. Бу ҳақда АҚШ Миллий Хавфсизлик Департаменти маълум қилди.
Ноқонуний муҳожирлар учун ишга туширилган янги дастурга асосан муҳожирлар CBP Home иловаси орқали мустақил депортация жараёнини расмийлаштириб, ватанига қайтгач, ушбу тўловни олиши мумкин бўлади.
Департаментга кўра, бу усул муҳожирларга иммиграция полицияси билан тўқнашмасдан, қонуний йўл билан мамлакатни тарк этишга ёрдам беради.
Шунингдек, ушбу дастур депортация харажатларини 70% га камайтириши мумкин. Ҳозирда бир нафар ноқонуний муҳожирни депортация қилиш ўртача $17 мингга тушади.
Қайд қилинишича, ушбу дастурдан аллақачон фойдаланиб, Гондурасга қайтган муҳожирлар бор.
Хабарда дастур доирасида ихтиёрий кетган шахслар ҳибсга олинмаслиги ва келажакда АҚШга қонуний кириш ҳуқуқи сақлаб қолиниши келтирилган.
Дастур АҚШ президенти ташаббуси билан жорий этилган.
Эслатиб ўтамиз, 2025 йил бошида Трамп ноқонуний муҳожирларни судсиз депортация қилишга рухсат берганди.
