Осиё чемпионатида 16 нафар ўзбекистонлик ўсмир боксчи финалга йўлланма олди
Бу иштирокчи давлатлар орасидаги энг юқори натижа бўлди
Тошкентда бокс бўйича U-15 ва U-17 ёш тоифалари ўртасидаги Осиё чемпионатининг ярим финал жанглари якунланди, деб хабар бермоқда Миллий олимпия қўмитаси матбуот хизмати.
Жумладан, ўсмирлар U-17 тоифасидаги баҳсларда Ўзбекистон терма жамоасининг 16 нафар вакили (6 нафар қиз ва 10 нафар йигит) финал йўлланмасини қўлга киритди.
Мазкур кўрсаткич бўйича Қозоғистон терма жамоаси 11 нафар финалчи билан иккинчи ўринни эгаллаган бўлса, кучли учликни 9 нафар финалчига эга Ҳиндистон терма жамоаси якунлаб турибди.
Маълумот учун, кичик ўсмирлар U-15 тоифасида ҳам 21 нафар боксчи финал йўлланмасини қўлга киритиб, энг юқори натижани қайд этган эди. Эртага 14 май куни U-15, 15-май куни эса U-17 ёш тоифаларида финал жанглари бўлиб ўтади.
