ППХ ходимининг 14 ёшли қизга шилқимлик қилгани билан боғлиқ хабарлар рад этилди
Ижтимоий тармоқларда ППХ ходимининг вояга етмаган қизга нисбатан ноқонуний хатти-ҳаракатлар қилганлиги ҳақида хабарлар тарқалди. Тошкент вилояти ИИББ бу хабарларни рад этиб, воқеа тафсилотларини очиқлади.
Эслатиб ўтамиз, тармоқларда тарқалган видеода Тошкент вилоятининг Оҳангарон шаҳрида 2011-йилда туғилган қиз 27-апрель куни кечқурун дугонаси билан ҳовли яқинида ўтирганида, уларнинг олдига маҳсус форма кийган патрул-пост хизмати ходими келиб, Spark машинасига ўтиришини сўраган. Эркак ҳуқуқни муҳофаза қилиш органи ходими кийимида бўлганлиги ва машинага ўтиришни қатъий талаб қилганлиги сабабли, қизлар рози бўлишган.
Шундан сўнг, у қизларни тоғ томонга олиб бориб, машинани ўчирган ва таъкидланишича, уларга шилқимлик қила бошлаган. Қизлардан бири ўз геолокациясини юборишга улгурган. Унинг акаси дўстлари билан воқеа жойига етиб бориб, машинани топишган. Эркак машина эшикларини қулфлаб, тўхтатишга йўл қўймаган ва воқеа жойидан қочишга уринган.
Мазкур ҳолат ваколатли органлар томонидан назорат тартибида ўрганилган. Суриштирувлар давомида тарқатилаётган хабарда келтирилган иддаолар мутлақо ҳақиқатга тўғри келмаслиги таъкидланди.
Қайд этилишича, 27-апрель куни, соат тунги 00:40 да Оҳангарон шаҳар ИИБ ППХ ходимига, таниши 22 ёшли А.К. (аёл) қўнғироқ қилиб, ундан маслаҳат олиш заруратини айтиб чақирган.
ППХ ходими етиб борган вақтида, 22 ёшли А.К.(аёл) билан, унинг 14 ёшли қиз таниши бирга чиқиб, ходимнинг машинасига ўтирганлар.
Шу вақтда 18 ёшли А.Х. (видеода мурожаат йўллаган шахс), 4 нафар танишлари билан келиб, ходимни ҳақоратлаб, жанжал кўтарган. У аслида 14 ёшли қизнинг ҳеч қандай қариндоши ҳисобланмайди.
Ҳолатда вояга етмаган қизнинг иштироки бўлганлиги сабабли, тўлиқ тафсилотлар ҳозирча очиқланмагани билдирилди.
